Memo Khabar 
राजविराज, १४ बैशाख । हनुमाननगर कंकालिनी नगरपालिकाद्वारा सञ्चालित मेयर कप टी ट्वान्टी क्रिकेट प्रतियोगितामा विहीबार सम्पन्न दुई खेलमा तिलाठी कोइलाडी गाउँपालिका र छिन्नमस्ता गाउँपालिकाको टिम विजयी भएको छ ।
बिहीबार सम्पन्न दुई खेलमा तिलाठी कोइलाडीले हनुमाननगर कंकालिनी नगरपालिकाको रेड टिमलाई ६ विकेटले र छिन्नमस्ता गाउँपालिकाको टिमले हनुमाननगर कंकालिनी नगरपालिकाको ब्लु टिमलाई १३० रनले पराजित गरेको छ ।
पहिलो खेलमा टस जितेर ब्याटिङ्ग गरेको हनुमाननगर कंकालिनी नगरपालिकाको रेड टिमले निर्धारित २० ओभरमा ९ विकेटको क्षतिमा १०८ रन बनाएको थियो । जसमा प्रज्वल झाले अविजित ३२ रन बनाए भने सौरभ झाले १८ तथा शैलेन्द्र राउत र सुमन यादवले १०/१० रनको योगदान दिएका थिए ।
तिलाठी कोइलाडीका लागि विकास दासले ४ ओभरमा १७ रन दिएर ३ विकेट लिए भने दिपेश सरदारले ४ ओभरमा १४ रन दिएर २ विकेट र साकेत सिंहले २ ओभरमा १४ रन दिएर २ विकेट लिएका थिए ।
जितको लागि १०९ रन पछ्याउने क्रममा तिलाठी कोइलाडीका अभिषेक कार्कीले २६ बलमा ३ छक्का र ७ चौकाको मद्तले ५३ रन बनाएका थिए । यसैगरी अमित मण्डलले २३ बलमा २ चौका र ३ छक्काको मद्तले २७ रन तथा विकास दासले १७ रनको योगदान दिदैं आफ्नो टिमलाई विजयी गराए ।
हनुमाननगर कंकालिनी नगरपालिकाको रेड टिमका लागि शैलेन्द्र राउतले ३ तथा तिलेश्वर मण्डलले १ विकेट लिएका थिए । उक्त खेलमा तिलाठी कोइलाडी गाउँपालिकाका विकास दासलाई हनुमाननगर कंकालिनी नगरपालिकाका सूचना प्रविधि अधिकृत अमित पाठकले म्यान अफ द म्याच प्रदान गरे ।
यसैगरी दोस्रो खेलमा टस जितेर ब्याटिङ्ग गरेको छिन्नमस्ता गाउँपालिकाको टिमले निर्धारित २० ओभरमा ८ विकेटको क्षतिमा १८३ रन बनाएको थियो । जसमा दिपेश कँडेलले २४ बलमा २ चौका र ३ छक्काको मद्तले अविजित ३५ रन बनाए भने मिनस थापाले ३३, फिर्दोश अन्सारले २७, रेवति रायले २३, रवि रायले १८ र सिद्धान्त लोहनीले १० रन बनाएका थिए ।
हनुमाननगर कंकालिनी नगरपालिकाको ब्लु टिमका लागि दिपक भुजेल र सुजित मण्डलले ३/३ विकेट लिए भने त्रिभुवन मण्डलले १ विकेट लिएका थिए ।
जितको लागि १८४ रनको विशाल लक्ष्य पछ्याउने क्रममा हनुमाननगर कंकालिनी नगरपालिकाको ब्लु टिम९ ओभर ५ बलमा सबै विकेट गुमाई ५३ रन मात्र जोड्न सक्यो । छिन्नमस्ताका बलरहरु दिपेश कँडेल र फिर्दोश अन्सारीको घातक बलिङ्ग सामु निरीह हुँदै ब्लु टिम १३० रनको विशाल अन्तरले हार ब्यहोर्न पुग्यो ।
दिपेश कँडेलले १ ओभर ५ बलमा १५ रन खर्चिदै ४ विकेट हात पारे भने फिर्दोश अन्सारीले ४ ओभरमा १५ रन दिएर ४ विकेट लिए । यसैगरी उपेन्द्र रायले २ विकेट हात पारे । उक्त खेलमा छिन्नमस्ता गाउँपालिका टिमका दिपेश कँडेललाई तिलाठी कोइलाडी गाउँपालिकाका कार्यक्रम अधिकृत राजेशकुमार झाले म्यान अफ द म्याच प्रदान गरे ।
शुक्रबारको पहिलो सेमिफाइनल खेल तिलाठी कोइलाडी गाउँपालिका र रुपनी गाउँपालिका बीच तथा दोस्रो सेमीफाइनल खेल छिन्नमस्ता गाउँपालिका र कञ्चनरुप नगरपालिकाको टिम बीच हुने हनुमाननगर कंकालिनी नगरपालिकाका सूचना प्रविधि अधिकृत अमित पाठकले जानकारी दिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |