छतबाट लडेर ९ वर्षीय बालकको ज्यान गयो

राजबिराज । सप्तरीको राजविराजस्थित एक छात्रावासको तेस्रो तलाबाट लडेर  ९ वर्षीय बालकको मृत्यु भएकाे छ ।

बिहिवार राजविराज–७ स्थित प्यारागन विद्यालयको तेस्रो तलाबाट लडेर डाकनेश्वरी नगरपालिका–७ का ९ वर्षीय मोहम्मद ममताजको ज्यान गएको हो । कक्षा २ मा अध्ययनरत ममताज प्यारागन विद्यालयमा कक्षासँगै छात्रावासमा बस्दै आएका थिए ।

गत वैशाख १२ गते विद्यालय र छात्रावासमा भर्ना भएका ममताज २१ गते बिहीबार साढे १२ बजे मात्र छात्रावास आएका उनी साँझ ५ बजेर ३९ मिनेटमा छतबाट लडेका थिए ।

छात्रावासमा ट्युसन पढिरहेका बेला साढे ५ बजे एउटा शिक्षकको पालो समाप्त भएको र त्यसपछि विद्यालयमा प्रिन्सिपल उमाकान्त साहले ट्युसन कक्षा लिने तयारी थियो ।

तर साह ट्युसन कक्षामा पुग्न केही मिनेट ढिलाइ भएको खाली समयमा विद्यार्थीलाई हेर्ने कोही नभएपछि विद्यालयको तेस्रो तल्लाको छतमा गएका बालक ममताज त्यहाँबाट लडेका थिए ।

त्यो तल्लामा रेलिङ छैन । रेलिङ नहुँदा तल हेर्ने क्रममा बालक लडेको हुन सक्ने अनुमान गरिएको छ । तेस्रो तल्लाबाट लडेपछि बालकलाई उपचारका लागि छिन्नमस्ता अस्पताल ल्याएको केहीबेरमै उनको ज्यान गएको थियो ।

सप्तरीका प्रहरी प्रमुख एसपी नरेन्द्रकुमार कार्कीले घटनाबारे अनुसन्धान भइरहेको जनाएको छ ।