स्रोत नखुलेको २ लाख भारतीय रुपैयाँसहित राजविराजबाट एक पक्राउ

राजविराज, १५ जेठ । सप्तरीको राजविराजस्थित गजेन्द्र चौकबाट सोमबार दुई लाख भारतीय रुपैयाँसहित एक जनालाई पक्राउ गरेको छ । पक्राउ पर्नेमा राजविराज नगरपालिका -९ मलेठ बस्ने ३७ वर्षीय सुरेश यादव रहेका छन् । 

राजविराजस्थित गजेन्द्रमा रोकिराखेको स.१ त. १३७४ नम्बरको पिकप भ्यानलाई शंका लागेपछि चेक गर्दा उक्त रकम सहित यादव पक्राउ परेका छन् । पक्राउ परेका यादव पिकप भ्यानका चालक हुन् ।

स्रोत नखुलेको पाँच सय रुपैयाँको चार सय थान भारतीय रुपैयाँ बरामद गरेको जिल्ला प्रहरी कार्यालय सप्तरीका प्रवक्ता एवं डीएसपी नरेश कुमार सिहको भनाई छ ।

प्रारम्भिक अनुसन्धान पछि थप अनुसन्धानका लागी पिकप भ्यानसहित यादवलाई सुनसरीको इटहरीस्थित राजश्व अनुसन्धान कार्यालय पठाइएको प्रहरीले जनाएको छ ।