नर्घोका बिवेक झाले १ करोड ९५ लाख ठगिगरेको आरोप

राजबिराज, ३१ जेठ । विदेशी कमाएको सम्पत्ति ठगिए पछि बोदेबरसाईन नगरपालिका -८ का मनिकलाल यादव र उनका परिवार बिचल्लीमा परेका छन् ।

राजगढ गाउपालिका ३ नर्घो निवासी डा विवेक झाले मेडिकल व्यवसायका लागि भन्दै पटक पटक गरी १ करोड ९५ लाख सापटी लिएको २ वर्ष बितिसक्दा पनि रकम फिर्ता नगरेको पीडित पत्रकार सम्मेलन मार्फत जानकारी गराएको छ ।

बुधबार राजविराजमा पत्रकार सम्मेलनको आयोजना गरी पीडित मनिकलालले सप्तरीको राजगढ गाउँपालिका र राजविराज नगरपालिका दुबै ठाउँमा घर भएका ३० वर्षीय दन्त रोग डा.विवेक कुमार झाले मेडिकल व्यवसायको नाममा आफू संग तीन वर्ष यता पटक पटक गरी १ करोड ९५ लाख रुपैयाँ सापटी लिएको र फिर्ता दिन अस्वीकार गर्दा आफू सहित पुरै परिवार समस्यामा परेको दुखेसो व्यक्त गरेका छन् ।

सापटी लिएको रकम माग्दा उल्टै मिटरब्याजीमा फसाई दिने र तहलगाई दिने भन्दै चेतावनी डा. झाले दिने गरेको उनले सुनाए । डा. झाको राजविराजको नेता चौकमा बालाजी डेन्टल क्लिनिक समेत संचालनमा छन् ।

“मेडिकल व्यवसायका लागी केही रकम चाहिएको छ ४/५ महिना भित्रै फिर्ता गरिदिन्छु भने पछी विश्वासमा परी पटक पटक गरेर १ करोड ९५ लाख रुपैयाँ डा. झालाई दिए, उनले भने, तर ३ वर्ष बितिसक्दा पनि रकम फिर्ता पाइएको छैन ।”

केही रकम हातहातै नगदै र १ करोड २८ लाख रुपैया बैङ्किक कारोबार मार्फत डा. झाको खातामा सोझै जम्मा गरिदिएको बताउँदै उनले पत्रकार सम्मेलनमा बैंक स्टेटमेण्ट, भाउचर, लगायतका कागजात समेत प्रमाणका रुपमा पेश गरेका छन् ।

मनिक लाल विगत १३ वर्ष देखि साउदी अरेबिया स्थित जर्मनीको डिवि– ईन्जिनियरींग एण्ड कन्सलटेन्सी वल्ड वाईड कम्पनीमा इन्जिनियर पदमा काम गर्दै आएका थिए । दैनिक १२/१३ घण्टा मिहिनेत गरेर कमाएको पैसा विश्वासमा परी सापटी दिदा अहिले आएर डा. झाले फिर्ता दिन नमानेको र पचाउने नियत देखाएको उनको गुनासो छ । निकै प्रयास गर्दा पनि झाले पैसा फिर्ता गर्ने नियत न देखाएपछि मनिक लालले समाजिक स्तरबाट दबाब बनाउन सूरु गरेका थिए ।

कुरा समाजमा बाहिरिए पछि प्रतिष्ठा गुम्ने डरले डा. झाले २०७८ साल असोज ८ गते आफ्नो नाममा रहेको सनराईज बैंक लिमिटेड शाखा राजविराजको खाता नं. ०२४१०१४६९२०१४ बाट साटिने गरी १ करोड ९५ लाखको चेक मनिक लाल लाई दिए । तर खातामा रकम न भएका कारण ४ पटक चेक बाउन्स भयो ।

खातामा पैसा नभएको जानी जानी चेक काटेर दिदा उनी न्यायका लागी डा. झा विरुद्ध बैङ्किक कसुर तथा सजाय ऐन २०६४ को दफा ३ (ग) अन्तर्गत कारवाहीका लागी प्रहरी हुदै अदालत सम्म पुगे ।

सोही अनुसार उच्च अदालत जनकपुरको वाणिज्य इजलासले २०८० जेठ २ गते जिल्ला प्रहरी कार्यालय सप्तरीलाई पक्राउ पुर्जी अनुमति सहितको सक्कल मिसिल पठाएपछि प्रहरीले सक्रियता देखायो । जिल्ला प्रहरी कार्यालय सप्तरीका प्रवक्ता डिएसपी नरेश कुमार सिंहका अनुसार बैङ्किक कसुर मुदामा अहिले डा. झा प्रहरी हिरासतमा छन् । ८ दिन अघि जेठ २३ गते काठमाडौंबाट टेकु प्रहरी परिसरको मदतले पक्राउ परेका डा. झालाई हिरासतमा राखी अनुसन्धान भइरहेको उनको भनाई छ ।

डा. झालाई छुटाउन आफन्तजनले २ दिन अघि जनकपुर–राजविराज इजलासमा बन्दी प्रत्यक्षीकरण रिट समेत दायर गरेका थिए । उनको तर्फबाट बहसपैरवीमा सहभागी कानून व्यवसायीले डा. झा निर्दोष भएको र झूटो अभियोग लगाएर थुनामा राखेको जिकिर गरे पनि अदालतले सो रिट निवेदन खारेज गरेको थियो ।

पिडीत पक्षले न्याय खोज्दै जाँदा राजनैतिक पहुँच र पैसाको चलखेल गरी आफुहरुलाई असुरक्षित बनाउने प्रयास समेत सूरु भएको भन्दै शान्ति सुरक्षाको व्यवस्थाका लागी पहल गरिदिन समेत पत्रकार सम्मेलनमा आग्रह गरेका छन् ।