कार्यवाहक मेयर परबिनले  बैठकको निर्णय उल्टयाएपछि वडाअध्यक्षहरूको आपती 

राजबिराज, ५ असार । राजविराज नगरपालिकाको हटिया भित्र अतिक्रमण गरिएको जग्गालाई वैधता दिन कार्यवाहक मेयर इसरत परबिनले कार्यपालिकाकै बैठकलाई उल्ट्याए पछि आन्तरिक विवाद चर्किएको छ । 

मंगलबार राजबिराज नगरपालिकाका वडा अध्यक्ष सहित कार्यपालिकाका बहुत सदस्यहरूले पत्रकार सम्मेलन गर्दै पालिका प्रवक्ता जयनारायण मण्डलले कार्यपालिकाको गत मंसिर २९ गते बसेको बैठकले हटिया भित्रको अतिक्रमित जग्गा खाली गर्ने सर्वसम्मतिले निर्णयलाई उल्टाएको भन्दै आपती जनाएको छ । 

उनले भने कार्यवाहक मेयर परबिनले आफ्नै नेतृत्वको कार्यपालिका बैठकको निर्णय उल्ट्याउदै जग्गा अतिक्रमण गर्नेहरूका लागि सारथीको रुपमा उभिएको प्रवक्ता मण्डले बताए ।

वडा ८ का अध्यक्ष समेत रहेका मण्डलले राजविराज हटियामा बर्सौ देखी जमिन अतिक्रमण गरिएकोले त्यसैलाई मध्यनजर गर्दै नगरपालिकाको कार्यपालिका बैठकले अतिक्रमण हटाउने निर्णय गरेको बताए । हटियामा अहिले सटरहरु निर्माण भैरहेको छ । ती सटर वरिपरि धेरै ब्यक्तिले हटियाको जग्गा अतिक्रमण गरेका छन । 

यो अतिक्रमण हटाएर नाला निर्माण गर्ने कार्यपालिका बैठकको म्यान्डेड थियो हटिया रहेको वडा नम्बर ७ का वडा अध्यक्ष सुभाष यादव भन्छन्, ‘तर कार्यवाहक मेयरले पहिला नाला नै निर्माण गर्ने सहमति दिएर अतिक्रमित जग्गालाई बैध्यता दिन खोजनुभयो ।’ 

कार्यपालिकाको बैठक विपरीत परबिनले निमित्त प्रमुख प्रशासकीय अधिकृत भोगेन्द्र यादव मार्फत सघन शहरी तथा भवन निर्माण आयोजनालाई पहिला नै नाला निर्माण गर्न पत्र पठाउन लगाएकी छन् । पत्र अनुसार ६ मिटर सडक र १ मिटर नालाको निर्माण कार्य यथाशीघ्र गराइदिन अनुरोध गरिएको छ । 

‘हटियामा धेरै अतिक्रमण गरिएको छ, हामिले त्यो हटाएर नाला निर्माण गर्ने भनेर कार्यपालिका निर्णय गरेका थियौ’ नगरपालिकाका प्रवक्ता समेत रहेका वडा अध्यक्ष जयनारायण मण्डलले भने, ‘ कार्यवाहक मेयरले गडबड गर्नुभएको छ, यो हाम्रो लागि सहाय हुदैन । 

यता राजबिराज नगरपालिका कावा ईसरत प्रविणले हटियाको अतिक्रमण हटाउन स्थानिय हटियावासी र  व्यापारीहरू सँग मिलेर अगाडि बढाउने बताइन ।