एसीसी यू-१६ इस्ट जोन कप क्रिकेटको उपाधि नेपाललाई

राजविराज । घरेलु टोली मलेसियालाई २ सय २१ रनले पराजित गर्दै नेपाल एसीसी यू–१६ इस्ट जोन कप क्रिकेटको उपाधि जित्न सफल भएको छ ।

नेपालले दिएको २५३ रनको लक्ष्य पछ्याउने क्रममा मलेसियाली टोली १४ ओभर ५ बलमा ३१ रन मात्र बनाएर अलआउट भयो । मलेसियाका लागि अक्रमले सर्वाधिक १० रन बनाए । अन्य व्याट्यम्यान दोहोरो अंक समेत जोड्न सकेनन् । पाँच जना व्याट्सम्यान खाता नै नखोली पेभेलियन फर्के ।

नेपालका लागि अभिषेक तिबारीले ६ र सन्तोष यादवले ३ विकेट लिए । टस जितेर पहिला व्याटिङ गर्दै नेपाल निर्धारित ३५ ओभरको खेलमा ८ विकेट गुमाएर २५२ रन जोड्यो । नरेन भट्ट ८९ बलमा अविजित ११२, निरजकुमार यादवले ४७ र सन्तोष यादवले २६ रन बनाए ।