जिल्ला प्रहरी कार्यालयमै पत्रकार कुटियो, महासंघ द्धारा कार्वाही को माग

राजबिराज, १५ साउन । नेपाल पत्रकार महासँघ सप्तरीका सल्लाहकार तथा इन्सेक सप्तरीका प्रतिनिधि मनोहर पोखरेल माथि जिल्ला प्रहरी कार्यालय सप्तरी भित्रै एक जना असईले कुटपिट गरेका छन् । 

सोमवार अन्नपूर्ण पोष्ट दैनिकका सप्तरी प्रतिनिधि समेत रहेका पोखरेल जिल्ला प्रहरी कार्यालय का असई राजेश्वर महतोको कुटपिटका कारण घाईते भएका छन् । संवेदनशिल अंग र अनुहारमा चोटपटक लागेका उनको राजविराजस्थित गजेन्द्रनारायण सिंह अस्पतालमा उपचार भइरहेको छ

समाचार सङ्कलनका लागि प्रहरी कार्यालयमा पुगेका पोखरेलले असई महतोसँग केही तथ्यांक माग गरेका थिए। तर, उनले फुर्सद छैन भन्दै विवाद गरे र अपशब्द प्रयोग गर्दै कुटपिट सुरु गरिहालेको प्रत्यक्षदर्शीले बताएका छन् । घट्ना लगत्तै नेपाल पत्रकार महासंघ सप्तरीका सचिव रामनारायण विश्वास नेतृत्वको टोलीले सप्तरी प्रहरीका एसपी नरेन्द्रकुमार कार्कीलाई भेटेर यस विषयमा छलफल गरेको छ । त्यस क्रममा एसपी कार्कीले दोषी असईलाई तीन दिनभित्र कारवाही गर्ने प्रतिवद्धता जनाएको सचिव विश्वासले जानकारी दिए ।

 यता नेपाल पत्रकार महासँघ शाखा सप्तरीले प्रेस विज्ञप्तिमा नेपाल पत्रकार महासंघ शाखा सप्तरीका सल्लाहकार  मनोहरकुमार पोखरेलज्यूमाथि राजविराजस्थित जिल्ला प्रहरी कार्यालय सप्तरीमा कुटपिट– दुब्र्यवहार जस्तो दुःखद घटना निन्दा गरेको छ । बिज्ञप्तीमा समाचार सङ्कलनमा जिल्ला प्रहरी कार्यालय पुग्नु भएका पत्रकार पोखरेलमाथि त्यहाँ कार्यरत प्रहरी सहायक निरीक्षक (असई) राजेश्वर महतोले दुर्व्यवहार गर्दै कुटपिट गरेको जनाएको छ ।

जिल्ला प्रहरी स्थित मुद्दा शाखामा जर्बजस्ती करणी र गर्भपतन सम्बन्धी मुद्दा प्रहरीले दर्ता गर्न  नमानेको भनी पीडित पक्षको गुनासोको आधारमा सोही विषयमा जानकारी लिन खोज्दा पत्रकार पोखरेलमाथि असई महतोले दुर्व्यवहार गर्दै कुटपिट गरेको हो । 

घटनाबारे जानकारी पाएर नेपाल पत्रकार महासंघका एक टोली जिल्ला प्रहरी कार्यालय सप्तरी पुगेर प्रहरी प्रमुख एसपी नरेन्द्र कार्कीलाई पत्रकार पोखरेलमाथि कुटपिट गर्ने असई महतोमाथि कारबाही गर्न माग गरेका छन् । घटना सम्बन्धमा प्रहरी प्रमुख एसपी कार्कीले जिल्ला प्रहरीको तर्फबाट क्षमायाचना गर्दै कुटपिट गर्ने असई महतोमाथि कानून बमोजिम तीन दिनभित्र कारबाही गर्ने प्रतिबद्धता गरेका छन् । 

टोली नेतृत्वकर्ता सचिव आरएन विश्वासले तीन दिनभित्र पत्रकार पोखरेलमाथि कुटपिट गर्ने असईमाथि कारबाही नगरिए महासंघ संघर्षमा उत्रिने चेतावनी दिएको छ । नागरिकलाई सूचित गराउने अधिकार बोकेका सञ्चारकर्मीलाई यसरी जिल्ला प्रहरी कार्यालयमै एक जना असईबाट कुटपिट हुनु भनेको प्रेसमाथिको ठाडो हस्तक्षेप भएको ठहर पत्रकार महासंघको छ ।

पछिल्लो केही दिनदेखि सप्तरीका प्रहरी–प्रशासनको तर्फबाट यसरी नै प्रेसविरुद्धको क्रियाकलाप हुँदैगएको छ । बिज्ञ्प्तीमा यस्ता घटनालाई नियन्त्रण गर्न र संविधानमै उल्लेख भएको पूर्ण प्रेस स्वतन्त्रतालाई कायम गर्न गृहमन्त्रालयसमेतको ध्यानाकर्षण गराएको छ ।