तामाङ र मगर समुदायलाई होच्याएर अभिव्यक्ति दिने अधिवक्ता पाण्डे विरुद्ध जिप्रका सप्तरीमा धर्ना

राजविराज, २२ साउन । अधिवक्ता भगवती पाण्डेले दिएको अभिव्यक्ति विरुद्ध तामाङ र मगर समुदाय सोमबार जिल्ला प्रशासन कार्यालय (जिप्रका) सप्तरी अगाडि एक घण्टा धर्ना बसेका छ्न ।  

तामाङ र मगर समुदायको विषयमा विवादास्पद अभिव्यक्ति दिने अधिवक्ता पाण्डे विरुद्ध  राजविराजमा नेपाल तामाङ घेदुङ जिल्ला समन्वय समिति सप्तरी  र नेपाल मगर संघ जिल्ला समन्वय समिति सप्तरीले संयुक्त रुपमा विरोध प्रदर्शन गर्दै धर्ना बसेका हुन ।

एउटा टिभी अन्तरवार्तामा अधिवक्ता पाण्डेले  तामाङ र मगरको विवाहको प्रसङ्गमा दिएको अभिव्यक्तिको विरोध स्वरुप आन्दोलनमा उत्रिएको नेपाल मगर संघ सप्तरीकी अध्यक्ष साधना राना मगरले बताइन । अधिवक्ता पाण्डेको अभिव्यक्तिप्रति आपत्ति जनाउदै उनीमाथि हदैसम्म कारबाहीको समेत माग गरेकी छिन् ।

आन्दोलित बनेका तामाङ र मगर समुदायले प्रमुख जिल्ला अधिकारी भुपेन्द्र थापा मार्फत ३ सूत्रीय माग राख्दै गृहमन्त्रीलाई ज्ञापनपत्र समेत बुझाएका छन् ।