चन्दन यादब 
राजबिराज । जनता समाजवादी पार्टी नेपाल सप्तरीले सिमा नाकाहरुमा सर्वसाधारणलाई आवतजावत सहज बनाउन माग गरेको छ ।
जसपा सप्तरीद्वारा शुक्रबार जिल्ला प्रशासन कार्यालयमा ज्ञापनपत्र बुझाउदै पछिल्लो समय सिमा नाकाहरुमा सर्वसाधारणलाई आवतजावतमा कठिनाइ भएको भन्दै सहज बनाउन माग गरेको हो ।
जिल्ला अध्यक्ष केदार प्रसाद यादवको नेतृत्व पुगेका जसपा नेताकार्यकर्ताले प्रजिअ किरण थापालाई ज्ञापनपत्र बुझाउदै सिमा नाकाहरुमा सर्वसाधारणलाई आवतजावतमा अनावश्यक दुखदिने गरेको स्मरण गराए ।
पछिल्लो समय आफान्त भेट्न भारतीय नम्बर प्लेटका मोटरसाइकल चढी आएकाहरुलाई प्रहरीले धरपकड गर्ने, मोटरसाइकल नियन्त्रणमा लिई भन्सारमा जिम्मा दिने र लिलाम गराउने गरेकाले त्यस्ता क्रियाकलापलाई अविलम्ब रोक्न जसपाले माग गरेको छ ।
जसपाको ज्ञापनपत्र बुझ्दै प्रजिअ थापाले जसपाको माग जायज भएको भन्दै स्थानीय स्तरबाट हुने समस्याको समाधान यहीँबाटै गर्ने तथा यहाँबाट हुन नसक्ने कुराको सम्बोधनका लागि माथिल्लो निकायसंग समन्वय गरि समस्या समाधानका लागि पहल गर्ने प्रतिबद्धता व्यक्त गरे ।
जसपाले बुझाएको ज्ञापनपत्रमा दुइदेशको कुटनैतिक मर्यादा विपरीत प्रहरी प्रशासनबाटै भारतीय नम्बर प्लेटका मोटरसाइकल नियन्त्रणमा लिने र दुर्व्यवहार गर्ने कार्यप्रति गम्भीर ध्यानाकर्षण भएको जनाएको छ ।
पछिल्लो समयमा सप्तरीका प्रहरी प्रशासनले भारतीय नम्बर प्लेटका मोटरसाइकल नेपाल प्रवेशमा रोक लगाउने र नियन्त्रणमा लिएर भन्सार कार्यालयमा जिम्मा लगाई लिलाम गर्ने जस्ता अनावश्यक दुख दिएको विषयप्रति हाम्रो गम्भिर ध्यानाकर्षण भएको छ , जसपाले बुझाएको ज्ञापनपत्रमा भनिएको छ, यस घटनाले सदियौदेखि नेपाल र भारत विचको गहिरो सम्बन्धलाई चिस्याउने तथा एक आपसको रोटीबेटिको सम्बन्धमा आँच आएको हाम्रो ठहर छ।
नेपालमा रहेका आफन्तजनलाई भेट्न आउने क्रममा हुने यस्तो बर्बरतापुर्ण व्यवहारले दुई मित्र राष्ट्र विचको मैत्रीपुर्ण सम्बन्धमा ठाडो चुनौती दिएको छ ज्ञापनपत्रमा भनिएको छ ।
भारतीय नम्बर प्लेटका मोटरसाइकलको भन्सार काटेर सहजरूपमा नेपाल प्रबेश गर्ने बाताबरण मिलाउन माग उल्लेख भएको ज्ञापनपत्रमा भारतबाट सप्तरी भित्रीने नाकाहरुमा मोटरसाइकल प्रवेशका लागि पासको व्यवस्था गर्न आग्रह गरिएको छ ।
भन्सार काटेर नेपाल प्रबेश गर्ने व्यवस्थाको प्रभवकारी कार्यान्वयन गर्न र भारतीय मोटरसाइकललाई सहज रुममा आफुले लिएको अनुमतिको आधारमा निर्बाध रुपमा संचालन गर्ने बाताबरण मिलाउन सम्बन्धित पक्षको ध्यानाकर्षण गर्दछौं साथै भारतबाट नेपाल प्रबेश गर्ने सबै नाकाहरुमा मोटरसाइकलको पासलिने व्यवस्था मिलाउन यसै ज्ञापन-पत्र मार्फत आग्रह गर्दछौं जसपा सप्तरीले बुझाएको ज्ञापनपत्र उल्लेख छ ।
दुई राष्ट्र विचको जनताको भावनात्मक सम्बन्धमा खलल आउन नदिन तथा आपसी सद्भाव र एकता विग्रन नदिन कुटनैतिक मर्यादा विपरीतको त्यस्ता किसिमको अमानवीय कार्यलाई तत्कालै रोकि मोटरसाइकलको सहज प्रबेशका लागि पास लिने स्थानको विस्तार गर्न माग गर्दछौं, जसपाले बुझाएको ज्ञापनपत्रमा भनिएको छ ।
. ज्ञापनपत्रमा राष्ट्रहित विपरीत प्रहरी प्रशासन र राज्य पक्षबाटै हुने कुनैपनी प्रकारको ज्यादती सह्य नहुने चेतावनी समेत दिईएको छ ।
जनता समाजवादी पार्टी नेपाल संघीय लोकतान्त्रिक गणतन्त्र, सबैप्रकारको अन्याय विभेद र भेदभाव विरुद्ध प्रतिबद्धरहि आन्दोलनमा रहेको अवगतनै छ । सामाजिक न्याय र समानताको पक्षमा चट्टान झै जनताको सार्वभौम सत्ताका लागि निरन्तर संघर्षत रहेको छ, ज्ञापनपत्रमा भनिएको छ, राष्ट्रहित बिपरित प्रहरी प्रशासन र राज्यपक्ष बाटै आम जनता माथी हुने कुनै पनि ज्यादतीको घटना स्वीकार्य हुदैन ।
उक्त अबसरमा उपसचिव शम्भु कुमार यादव, निलेश कुमार झा, जिल्ला कार्यकारिणी समिति सदस्य लक्ष्मण यादव, राजेश्वर राय, समाजवादी विद्यार्थी युनियनका केन्द्रिय सदस्य श्याम कुमार यादव लगायतका जसपा नेताकार्यकर्ताहरुको सहभागीता रहेको थियो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |