Memo Khabar 
राजविराज, ३० भदौ । जनता समाजवादी पार्टी (जसपा) नेपाल सप्तरीको राजविराजमा भातृ तथा पेशागत संगठनहरुको जिल्ला स्तरीय संयुक्त विस्तारित बैठक शनिबार सम्पन भएको छ ।
कार्यक्रमलाई सम्बोधन गर्दै जसपाका केन्द्रिय सदस्य विकास कुमार तिवारीले गौर घटना दुर्भाग्यपूर्ण भएको बताए । गौर घटना नहुँनु पर्ने घटनाको रुपमा जसपाले लिएको बताउदै नेता तिवारीले गौर घटना माओवादीको दम्भ र माओवादी पीडितहरुको आक्रोशका कारण दुर्भाग्यपूर्ण घटना घटेको टिप्पणी गरे ।
उनले गौर घटनामा जसपा निर्दोष रहेको जिकिर गरे । गौर घटना तत्कालीन माओवादी नेता प्रभु साहको हठ र माओवादी पीडितहरुको आक्रोशको उपज भएको उनले स्पष्ट पारे ।
जसपा सप्तरीका अध्यक्ष केदार प्रसाद यादवले प्रचण्ड नेतृत्वको सरकारले देशमा मुटभेट निम्त्याउन खोजेको आरोप लगाए । १७ बर्ष पुरानो गौर घटनालाई उचालेर सरकार र आन्दोलनरत पक्ष विच भएको शान्ति सम्झौतालाई भंग गर्न प्रचण्ड सरकार लागिपरेको उनले उल्लेख गरे ।
मधेशी मोर्चा र सरकार विच भएको २२ र ८ बुँदे सम्झौता विपरीत सरकार अगाडि बड्ने प्रयास गरेको बताउदै अध्यक्ष यादवले पार्टी विरोधी षड्यन्त्र विरुद्धको आन्दोलनको तयारी गर्न समेत नेताकार्यकर्तालाई आग्रह गरे ।
जिल्ला अध्यक्ष यादवको अध्यक्षतामा आयोजित कार्यक्रममा प्रेस मञ्च नेपाल सप्तरीका पुर्व अध्यक्ष बृजमान तामाङ, जसपा जिल्ला कार्यकारिणी समिति सदस्य लक्ष्मण यादव , समाजवादी विद्यार्थी संगठनका केन्द्रिय उपाध्यक्ष मनिस यादव, समाजवादी युवा संघका केन्द्रिय सचिव विशाला यादवलगायतकाले मन्तव्य व्यक्त गर्दै अधिकार सुनिश्चितताको लागि आन्दोलनको विकल्प नरहेको बताए ।
यसैगरी समाजवादी महिला संघ सप्तरीका अध्यक्ष रमिलदेवी साह,,समाजवादी शिक्षक फोरम सप्तरीका अध्यक्ष उपेन्द्र यादव, स्वास्थ्यकर्मी फोरम नेपाल सप्तरीका अध्यक्ष राम कुमार यादव, समाजवादी दलित संघ सप्तरीका अध्यक्ष अशोक कुमार राम, समाजवादी युवा संघ सप्तरीका अध्यक्ष शिवम यादव, समाजवादी विद्यार्थी संघ सप्तरीका उपाध्यक्ष एवम् मविव क्याम्पस राजविराजका स्ववियु सभापति रन्जित कुमार यादवले समेत मन्तव्य व्यक्त गरे ।
कार्यक्रममा जसपा राजनीतिक समिति सदस्य अमर मण्डल, केन्द्रिय सदस्य गिता यादव,प्रदेश सदस्य एवम् सिराहा जिल्ला इन्चार्ज कौशेन्द्र यादव, प्रदेश सदस्य अमृत साफी,जिल्ला अन्तर्गत पार्टी निकट विभिन्न तहका पदाधिकारी तथा प्रतिनिधिहरु,
जनप्रतिनिधिहरु, भातृसंगठनका विभिन्न तहका पदाधिकारीहरुको उपस्थिति रहेको बैठकमा समाजवादी विद्यार्थी युनियनका केन्द्रिय सदस्य श्याम कुमार यादवले गौर घटनाको यथार्थता र भ्रम तथा पार्टीको भावी रणनीति बारे प्रकाश पारे ।
समाजवादी विद्यार्थी युनियनका केन्द्रिय सचिव तारकेश्वर यादवद्वारा संचालित कार्यक्रममा स्वागत समाजवादी महिला संग सप्तरीकी सदस्य ममता दासले गरिन ।आन्दोलनको तयारीका लागि भातृ तथा पेशागत संगठनहरुको जिल्ला स्तरीय विस्तारित बैठक आयोजना गर्ने लगायतका विभिन्न निर्णय गर्दै बैठक सम्पन्न भएको जसपा सप्तरीले जनाएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |