राजबिराजलाई सुन्दर र सफा नगर बनाउन सबै एकजुट बनाै

राजबिराज, o२ असोज । राजबिराजलाई सुन्दर र सफा नगर बनाउन सार्वजनिक स्थलमा सरसफाई गर्नुपर्नेमा सहभागीहरूले जाेड दिएका छन ।

मंगलवार एका बिहानै राजबिराज नगरपालिका प्रशासकिय अधिकृत बिष्णु प्रसाद गुरूङ सहित टिमले सुरु गरेको राजविराज ७ स्थित रहेको भगवती पोखरी सरसफाइ अभियानमा जनप्रतिनिधिदेखि कार्यालय प्रमुखहरूले समेत सहयोगमा जुटेका थिए ।

तिन दिन अघि अधिकृत गुरुङ नेतृत्वको नगरपालिका एक्लैले सुरु गरेको सरसफाई अभियानमा जनप्रतिनिधि तथा कार्यालय प्रमुखहरुले सहभागीता जनाएका हुन् ।

दुषित पोखरी सरसफाइ अभियानमा अहिले नगरप्रमुख, प्रमुख जिल्ला अधिकारी, प्रहरी प्रमुख, नेपाली सेनाका प्रमुख सेनानी, सशस्त्र प्रहरी प्रमुख नेतृत्वको टोलीदेखि विभिन्न व्यक्ति तथा कार्यालयका प्रमुख समेतले सहभागिता जनाउन थालेका छ्न ।

नगरपालिका तथा वडाको गुरुङ नेतृत्वको टोली राजविराज वडा नम्बर ७ स्थित नगरपालिका कार्यालय नजिकै अगाडि रहेको भगवती मन्दिरस्थित भगवती पोखरी सरसफाई गर्न थाले पछी अन्य कार्यालय तथा ब्यक्तीहरुले समेत यसमा साथ दिन थालेको वडा नम्बर ७ का वडा सदस्य रमानन्द देवले बताए ।

गुरुङ यस नगरपालिकामा भदौ २५ गते हाजिर भएपछि २६ गते मर्निङ वाकमा निस्केको बेला छेउमै रहेको पोखरीको अवस्था देखेर चिन्तित भए । उनी ५ दिन पश्चात् भदौ ३१ गतेदेखी सो पोखरीको सरसफाई गर्न वडा तथा नगरपालिकाको टोलीसहित जुटे ।

त्यसबेला उनीसहितको टोलीले मात्र पोखरीमा फ्याकिएको फोहर निकाल्दै बाहिर राख्थे । त्यस छेउका वासिहरु उनीहरुलाई पोखरीबाट फोहर निकालेको हेर्ने काम मात्र गर्थे । उनीहरुलाई कुनै प्रकारको सहयोग गरेनन् ।

वरिपरिका वासिन्दाले पोखरीमा विसर्जन गरेको फोहर बाहिर निकालेर थुपार्ने काम बारे खबर प्राप्त भएपछी निलम्बित नगरप्रमुख भिमराज यादव कार्यबाहक नगर प्रमुख इसरत परविन, प्रजिअ किरण थापा, बरख गण राजविराजका गणपति प्रमुख सेनानी रमेश पाण्डे, सप्तरीका प्रहरी प्रमुख एसपी नरेन्द्र कुमार कार्की, सशस्त्र प्रहरी उपरीक्षक तिर्थराज पौडेलले सोमबार उनीहरुको सरसफाई अभियानमा साथ दिए ।

आफ्ना कर्मचारीको साथ आएका उनीहरुले गुरुङ नेतृत्वको नगरपालिकाको एकल प्रयासमा सूरु भएको स्वच्छता अभियानको बारेमा नगरपालिकाले जानकारी गराएपछि आफुहरु समेत सहभागी हुन पाउँदा निकै खुशी लागेको बताए ।

यस्तो कार्यमा अन्य पक्षले पनि सघाउँदा राजविराज सुन्दर र सफा नगर बन्न सक्ने तथा सरसफाई सबैलाई चाहिने हुँदा घरदेखि सबै सार्वजनिक स्थलमा सरसफाई गर्नुपर्नेमा सहभागी जनप्रतिनिधि र कार्यालय प्रमुखहरुले जोड दिए ।

बाँकेको डडुवा गाउँपालिकाबाट सरुवा भइ आएको गुरुङले हिमाल, पडाह र तराई जहाँ भएपनि देश हाम्रै भएको भन्दै सबै ठाउँ सुन्दर र सफा हुनु पर्छ भन्ने मान्यताका साथ सुरुमा नगरपालिकाले एक्लै स्वच्छता अभियान चलाएकोमा अहिले आएर सहयोगी हातहरु थपिदै गएकोमा निकै खुशी र आत्मसन्तुष्टी मिलेको बताए ।

उनले नगरपालिकाले थालेको सरसफाइ अभियानमा नगरबासी, जनप्रतिनिधि ,संचारकर्मी, युवा विद्यार्थी, राजनीतिक दल र सरोकारवाला संघसंस्थालाई सहयोगका लागि आग्रह गरे ।

राजविराज नगरपालिकाको प्रमुख प्रशासकीय अधिकृतको रुपमा तेस्रो पटक हाजिर भएका गुरुङले यसअघि समेत सरसफाइ, भौतिक पुर्वधार निर्माण, ट्राफिक व्यवस्थापन, अतिक्रमण हटाउनेलगायत कार्यमा योगदान गरेको भन्दै प्रशंसा हुदै आएको थियो ।