दशैँ लागेपनि राजबिराजमा खासै छैन व्यापार, व्यापारीहरु फुर्सदिला

राजबिराज, २९ असोज । अचेल राजविराजमा केही भीडभाड बढे पनि व्यापार भने बढ्न सकेको छैन ।  दशैँ तिहार आउँदा पनि व्यापार चम्कन नसकेपछि व्यापारी निराश छन् ।

सप्तरीको राजबिराजमा २० वर्षदेखि कपडा पसल सञ्चालन गर्दै आएका मायसोप का संचालक सन्दिप चौधरीले भन्छ, दशैँ तिहारको मुखमा पनि खासै व्यापार नहुँदा मन खिन्न हुन्छ, दिनभरी पसल खोलेर बस्नु मात्रै हुन थालेको छ ।

अघिल्ला वर्षमा दशैँ र तिहार आउनु अघि देखि नै दिनको २५ देखि ३० हजारको कपडा बिक्री गर्ने सन्दिप यसपटक दिनको पाँचदेखि १० हजारको पनि व्यापार गर्न गाह्रो भइरहेको बताए ।

पुरानो कपडा व्यवसायी थानसिँह भन्सालीेले दशैँ तिहारको बेलामा बजारमा ग्राहकको चहलपहल खासै नभएको सुनाए । अघिल्ला वर्षका दशैँ  तिहारमा दैनिक १० देखि १५ हजारको कपडा व्यापार गर्थेँ । हाल दिनको एक हजार देखि  दुई हजार सम्म पनि कमाउन मुस्किल भइरहेको छ, भन्सालीले भने ।

सडक पेटीमा लामो समयदेखि दशैँ तिहारका लागि आवश्यक कपडा लगायतका सामग्री व्यापार गर्दै आएका वृद्धा मोहम्मद हसनले यसपटक खरिद गर्ने ग्राहक नआएको सुनाए ।

बजारमा दशैँ तिहारको रौनक छाएसँगै जिल्ला प्रशासन कार्यालय सप्तरीले बजार अनुगमन पनि शुरु गरेको छ । यता जिल्लाका प्रहरी कार्यालयले नजिकै आइरहेको दीपावली र छठ पर्वमा पटका पड्काउने र आतिशबाजी जस्ता कार्य नगर्न समस्त जिल्लावासीलाई आग्रह गरेको छ ।