खडक नगरपालिकाको वडा नम्वर ११ बालविवाह मुक्त वडा घोषणा

सुन्दर समृद्ध नगर निर्माण गरी समुन्नत नागरिक समाजको विकास गर्न दीर्घकालीन लक्ष्य : नगर प्रमुख जयप्रकाश 

राजबिराज । सुन्दर समृद्ध वडा र नगर निर्माण गर्ने उद्देश्य अनुरूप खडक नगरपालिकाको वडा नम्बर ११ एक समारोह बिच नगरकै पहिलो वडा बालविवाह मुक्त वडा घोषणा गरेको छ ।

बिहीवार खडक नगरपालिकाका नगर प्रमुख जयप्रकाश चौधरीले वडा नम्बर ११ लाई बालविवाह मुक्त वडा औपचारिक रुपमा घोषणा गरेका छन ।

विगत एक वर्षमा जम्मा वडामा २९ वटा विवाह भएको मध्येमा २० वर्षमुनि उमेरको ५ वटा र १८ वर्षमुनि विवाह भएको संख्या शून्य गरी जम्मा ५ वटा बाल विवाह भएकोले नगरपालिकाको बालविवाहमुक्त अभियान सञ्चालन निर्देशिका २०७९ ले दिएको अधिकार प्रयोग गरी सूचकहरू पूरा गरेपछि बाल विवाह मुक्त वडा घोषणा गरिएको हो ।

सो अवसरमा खडक नगरपालिकाका नगर प्रमुख जय प्रकाश चौधरीले सुन्दर समृद्ध वडा र नगर निर्माण गरी समुन्नत नागरिक समाजको विकास गर्न दीर्घकालीन लक्ष्य रहेको बताए ।

वडावासीको सहभागितामा आधारित उच्च गुणस्तरीय समाजको विकास गर्ने दीर्घकालीन सोच अनुरूप पालिकाका सबै वडाहरुलाई बालविवाह मुक्त घोषणा गरी नगरपालिकालाई नै बाल विवाह मुक्त नगर घोषणा गर्ने उद्देश्यका साथ सचेतनामूलक कार्यक्रमहरू सञ्चालन गर्दै वडा ११ लाई बालविवाह मुक्त वडा घोषणा गरेको बताए ।

यसैगरी नगर उप प्रमुख रिता चौधरीले बाल विवाह बालसंरक्षणको गम्भीर चुनौती तथा दण्डनीय अपराध भएको बताउँदै सबै सूचकहरू पूरा गरी बाल विवाह मुक्त नगर घोषणाका साथ समुन्नत समाज निर्माण गर्नुपर्ने विचार राखिन् ।

११  नम्वर वडाका अध्यक्ष तथा वडा बालअधिकार समितिका संयोजक रामकृष्ण चौधरीले ११ नं वडा नगरको बालविवाह मुक्त घोषणा गर्ने दोस्रो वडा बनेको बताए ।

सेभ द चिल्ड्रेन र सबल नेपालको आर्थिक तथा प्राविधिक सहयोग र खडक नगरपालिकाको नेतृत्वमा सञ्चालित समुन्नति कार्यक्रम अन्तर्गत बालविवाह विरुद्धको अभियानको नतिजा स्वरुप बालविवाहमुक्त क्षेत्र घोषणा शुरु गरिएको नगर प्रमुखले कार्यक्रममा जानकारी गराए ।

बाल विवाह मुक्त वडा घोषणा सभामा बालक्लबमा आवद्ध बालबालिकाहरूले विभिन्न सन्देशमूलक सडक नाटक तथा नृत्यहरू प्रदर्शन गरेका थिए ।

खडक नगरपालिकाले बालविवाह न्यूनीकरणका लागि विभिन्न चार चरणहरुको अभियान पूरा गरी वडाहरूलाई बाल विवाह मुक्त वडा घोषणा गर्न शुरु गरिएको सबल नेपालका कार्यक्रम संयोजक रोशन मण्डलले जानकारी दिए।

यस अघि सप्तरी जिल्लाकै सुरुङ्गा नगरपालिका जिल्ला तथा मधेश प्रदेशकै पहिलो बालविवाह मुक्त पालिका घोषणा भइसकेको छ भने मधेश प्रदेश सरकारले बालविवाह विरुद्धको दश वर्षे रणनीतिक योजना तर्जुमा गरी बालविवाह विरुद्धका कार्यक्रमहरू सञ्चालन गर्दै आएको छ ।