बालक भन्दा बढी बालिकाहरू घरभित्रै बालश्रमको सिकार हुँदै

राजविराज । लैंगिक हिंसा बिरूद्ध १६ दिने अभियानमा अन्तर्गत आठौं दिन शनिवार परिकल्पना नेपाल सप्तरीले राजविराज नगरपालिका वडा नं १ मा बालिकाहरू सँग बालश्रमको विषयमा अन्तरक्रिया कार्यक्रम गरेको आयोजना गरेको छ ।

कार्यक्रममा सहभागी बालिकाहरूले बालक भन्दा बढी बालिकाहरू घरभित्रै बालश्रमको सिकार हुँदै आएको बताए । उनीहरूले केही बालकहरू घर बाहिर बालश्रम गरेको देखिएपनि खासगरि ग्रामीण भेगका बालिकाहरू घरभित्र देखि बाहिरको काममा जोतिएर बालश्रमको सिकार हुनुपर्ने बाध्यता रहेको धारणा व्यक्त गरे ।

काममा लगाएर विद्यालयबाट वाञ्चित गर्नु, शारीरिक, मांसिक, सामाजिक रूपमा बालबालिका पीडित र प्रताडित भएर बालश्रमको सिकार भएको कयौं उदाहरण भएपनि अहिले पनि परिवार र समाज यस विषयमा गम्भीर नभएको उनीहरूको तर्क थियो ।

कार्यक्रममा ५० जना बालिकाहरूको उपस्थिति रहेको थियो । संस्थाका अध्यक्ष सुधा देवको अध्यक्षतामा आयोजित कार्यक्रमको संचालन सहसचिव पिंकी मण्डलले गरेकी थिइन् ।

कार्यक्रममा बालश्रमको विषयमा कार्यक्रमका प्रमुख अतिथि प्रहरी निरीक्षक हृदय यादव सामुदायिक सेवा केन्द्रका अध्यक्ष धिरेन्द्र दास ,परिकल्पना नेपाल सप्तरीका अध्यक्ष सुधा देव, आसमान नेपालका शान्ता सिंह लगायतले  बालश्रम भनेको के हो र नेपालमा बालश्रमबाट पर्दै आएको असर ,बालश्रमलाई न्यूनीकरणका लागि गर्नुपर्ने पहल लगायत विषयमा बृहत् रूपमा सहभागीहरूलाई जानकारी गराएका थिए ।

लैंगिक हिंसा अन्त्यको सुनिश्चितता : महिला र  बालबालिकामा लगानीको ऐक्यवद्धता नाराका साथ यस वर्ष सप्तरी सहित विश्वभर सरकारी तथा गैरसरकारी संस्थाहरूले यो अभियान नोभेम्बर २५ देखि डिसेम्बर १० सम्म विभिन्न कार्यक्रम गरि मनाउँदै आएका छन् ।