राजविराजका वडा सदस्यहरू द्वारा नगरपालिकामा धर्ना

राजबिराज । सप्तरीको राजविराज नगरपालिकाका वडा सदस्यहरुले बिहीबार नगरपालिका कार्यालयमा एक घण्टा धर्ना दिएको छन ।

नगरपालिकाका कर्मचारीहरूले हाजिरी गरेर कार्यालयमा नबस्ने गरेको भन्दै उनीहरूले ७ बुदे माँग राख्दै उनीहरूले आन्दोलनमा उत्रेका हुन ।

नगरपालिकाका वडा सदस्यहरुले २२ पुसमा कार्यालय समयमा कर्मचारी अनिवार्य रुपमा कार्यालयमै बस्नुपर्ने लगायतका सात बुँदे माग राख्दै कार्यबाहक प्रमुख इसरत परबिनलाई ज्ञापनपत्र बुझाएका थिए ।

एक साताको अल्टिमेटम दिएर ज्ञापन बुझाएपनि कुनै चासो नलिएपछि २९ पुसमा संघर्ष समिति बनाएर उनीहरूले आन्दोलनको घोषणा गरेका थिए ।

आन्दोलनको कार्यक्रम अनुसार बिहीबार नगरपालिका उनीहरूले कार्यालयमा एक घण्टा धर्ना दिएको संघर्ष समितिका संयोजक वडा नम्बर ७ का सदस्य रमानन्द देवले बताए ।

उनीहरूको कार्यालयमा कर्मचारी नबस्दा आम जनता सेवा सुविधाको लागि भौंतारिनुपर्ने अवस्था आएकाले शाखामा कर्मचारी कार्यालय समय अवधिभर अनिवार्य बस्नुपर्ने व्यवस्था मिलाउनुपर्ने, बर्षाैदेखि आफ्नै जग्गा बेचबिखन गर्न नपाउनुका साथै ऋण समेत उठाउन नपाएका हजारौं घर परिवार बिटौरी जग्गाबालालाई अबिलम्ब जग्गाधनी पूर्जा उपलब्ध गराउन पहल गर्नुपर्ने र तत्काल उपलब्ध गराउन नसकिए जग्गाबालाले आफ्नो जग्गा धितो राखी ऋण पाउने व्यवस्था मिलाउन पहल गर्नुपर्ने माग गरेका छन् ।

यस्तै,नगरसभाबाट पारित यस बर्षका योजनाको एकसाताभित्र सम्झौता गरी कार्य सुचारु गर्नुपर्ने, नगर क्षेत्रभित्र सरसफाईलाई उच्च प्राथमिकता राखी सोको स्थायी व्यवस्थापनका लागि थप सबारी साधन, नगर क्षेत्रको चारैतर्फ रहेका भलुवाही ढल निकासको व्यवस्थापन र डम्पिङ साइटको अबिलम्ब व्यवस्थापन गर्नुपर्नेसहितका माग उनीहरुको रहेको छ ।