गुरुङलाई कामकाज गर्न अबरोध नगर्न अल्पकालिन आदेश

राजबिराज । राजविराज नगरपालिकाका प्रमुख प्रशासकीय अधिकृत विष्णुप्रसाद गुरुङलाई नियमित कामकाज गर्न अवरोध नगर्न, गर्न नदिन विपक्षीहरुको नाउँमा अल्पकालीन अन्तरिम आदेश जारी भएको छ ।

उच्च अदालत जनकपुर राजविराजका न्यायाधीश कोशलचन्द्र सुवेदीको इजलासले बुधबार राजविराज नगरपालिकाकी कार्यबाहक नगरप्रमुख इसरत परविन सहित विपक्षीहरुको नाउँमा अल्पकालीन आदेश जारी गरेको हो ।

अन्तरिम आदेशको छलफलको पेशी तोकिएको मिति सम्म संघीय मामिला तथा सामान्य प्रशासन मन्त्रालय फिर्ता पठाउने निर्णय कार्यान्वयन नगर्न तथा गुरुङलाई कामकाजमा अबरोध नगर्न, नगराउन कार्यबाहक मेयर परविन सहित विपक्षीको नाममा अल्पकालीन अन्तरिम आदेश जारी गरिएको उच्च अदालतद्वारा जारी आदेशमा उल्लेख छ ।

आफुलाई नगरपालिकाले कानुन विपरीत मन्त्रालय पठाउने पत्र थमाएको दावी गर्दै बदरको माग राखि प्रमुख प्रशासकीय अधिकृत गुरुङले मंगलबार उच्च अदालतमा दायर गरेको रिटमाथि सुनुवाइ गर्दै न्यायाधीस सुवेदीले उक्त आदेश जारी गरिएको छ ।

न्यायाधीश सुवेदीको इजलासले मुद्दाको अन्तिम टुंगो नलाए सम्म नगरपालिकाले गरेको निर्णय कार्यान्वयन नगर्न र प्रमुख प्रशासकीय अधिकृत गुरुङलाई कामकाज गर्न अबरोध नगर्न विपक्षीको नाममा अन्तरिम आदेश जारी गरेको छ ।

गुरुङलाई फिर्ता पठाउनुको आधार , कारण र प्रमाण भए आदेश जारी भएको १५ दि भित्र नगर प्रमुख आफै वा आफ्ना कानुन बमोजिमको प्रतिनिधि मार्फतलिखित जवाफसहित उपस्तिथि हुन तथा सो बारे विपक्षीहरुलाई जानकारी गराउन आदेशमा भनिएको छ ।

गुरुङले नगरपालिकाले आफ्नो क्षेत्र अधिकार नाघेर संघीय मामिला तथा सामान्य प्रशासन मन्त्रालयमा फिर्ता पठाउने निर्णय गरि पत्र थमाएपछि सोको विरुद्धमा उच्च अदालत जनकपुर राजविराज इजलासमा रिट दायर गरेको बताएका छन् ।

उनले नगरपालिकाको निर्णय कानुन बिपरित रहेको दावीसहित उच्च अदालत जनकपुर राजविराज इजलासमा उत्प्रेसनको रिट दायर गरेका थिए ।