विष्णुपुर गाउँपालिकामा विद्यालय बन्द हुदाँ पठनपाठन अवरोध, ७ हजार भन्दा बढी विद्यार्थी प्रभावित

राजबिराज ।  सप्तरीको विष्णुपुर गाउँपालिकाका शिक्षकहरूले तलब नपाएको भन्दै विद्यालय बन्द भएपछि विद्यार्थीहरूको पठनपाठनबाट बञ्चित हुन पुगेको छ । गत साउनदेखि नै शिक्षकहरू तलब भत्ता नपाएपछि मंगलबार देखी विद्यालय बन्द गरी उनीहरु पालिकामा धर्ना दिइरहेको छ ।

एसईई र वार्षिक परीक्षा नजिकिँदै गर्दा विद्यालयमा कार्यरत शिक्षकहरू तलबभत्ता माग्दै गाउँपालिका कार्यालयमा धर्ना बसेपछि विद्यालयहरू बन्द गरेपछि विद्यार्थीहरू प्रत्यक्षरूपमा पठनपाठनबाट बञ्चित हुन पुगेको छ । विष्णुपुर गाउँपालिका अन्तर्गत १७ वटा विद्यालयमा ७ हजार ३ सय विद्यार्थी प्रत्यक्ष रूपमा अध्ययनरत रहेका छन ।

संघर्ष समितिका संयोजक प्रधानाध्यापक कुशेश्वर मण्डलले भने एक सय ९२ जना शिक्षकहरू मध्ये १३ जनाले गत वैशाखदेखि नै तलब खाएका छैनन्’ प्रअ मण्डलले भने, ‘बाँकी एक सय ७९ जनाले गत साउनदेखि नै तलब पाएका छैनन् ।’ ‘सात – आठ महिनादेखि तलब नपाउँदा घर परिवार चलाउनै शिक्षकहरूलाई मुस्किल भएको शिक्षिका जंजिरा यादब बताइन ।

‘पटक पटक गाउँपालिका कार्यालयमा तलबका लागि आग्रह गरेपनि पालिका गम्भीर नभएकोले, बाध्य भएर विद्यालय बन्द गरि धर्नामा बस्नु परेको बताइन शिक्षकहरूलाई तलब खुवाउन बारम्बार पालिकामा पहल गरेपनि पालिका गम्भीर नभएको कारण शिक्षकहरूलाई समयमा तलब खुवाउन नसकेको शिक्षा संयोजक अर्जुन यादबले बताए ।

यता शिक्षकहरू सँगै विष्णुपुर गाउँपालिकाका कर्मचारीले गत साउन यता तलब नपाएको पालिका कर्मचारीहरू बताउँछन् । गाउँपालिकाका अध्यक्ष निलम्बित भएपछि गाँउ सभामा बहुमत अल्पमतको खेल हुँदा सभा हुन सकेको छैन । सभा हुन नसक्दा पालिकामा कार्यरत कुनैपनि कर्मचारीले तलब खान पाएका छैनन् भने विकास निर्माण लगायत सबै कार्यहरू ठप्प छ ।

पालिकाकी कार्यवाहक अध्यक्ष रेणुकुमारी यादवले गाँउ सभा गरेको दाबी गरिन् । ‘गाउँसभा गरि निर्णय कार्यान्वयनका लागि प्रमुख प्रशासकीय अधिकृतलाई दिएँ तर उनले कार्यान्वयन गरेनन्’ उनले भनिन् । विष्णुपुर गाउँपालिकाका प्रमुख प्रशासकीय अधिकृत उज्ज्वल आनन्दको सरुवा भएसँगै यो पालिका अब प्रमुख प्रशासकीय अधिकृतबिहीन पनि भएको छ ।