मधेस सरकारले राजविराजमा स्थापना गरेको यातायात कार्यालयले संकलन गर्यो १२ करोड बढी राजश्व 

राजविराज, ८ चैत । मधेस प्रदेश सरकारले सेवा बिस्तार गर्दै राजविराजमा यातायात ब्यवस्था सेवा कार्यालय सञ्चालन गर्दा सेवाग्राहीलाई आफ्नै ठाउँमा सेवा लिन सहज त भएको छ । तर, सेवाग्राहीको बढ्दो चाप रहेको अवस्थामा दरबन्दी बमोजिम कर्मचारी नहुँदा सेवा प्रदान गर्न कठिनाई समेत भइरहेको छ ।

राजविराजमा स्थापना भएको यातायात कार्यालयबाट २०७९ चैत २६ गते देखि सवारी चालक अनुमति पत्र वितरणको कामसँगै सवारीसाधनको नवीकरणसमेत सुरु भयो । यो छोटो अवधीमा कार्यालयले झण्डै १२ करोड बढी राजश्व संकलन गरेको छ । 

आफ्नै ठाउँमा सवारी अनुमति पत्र पाउने भएपछि खुशीको कुरा नै हो’, भर्खर सवारी अनुमति पत्रको परीक्षमा उत्तिर्ण भएका स्थानीय विशालकुमार मण्डलले भने, ‘पहिले हामीलाई लाईसेन्सकालागि लहान–इटहरीदेखि जनकपुरसम्म धाउनुपर्थ्यो ।’

यता कार्यालय स्थापनाको सुरुवाती चरणमै सवारी अनुमुति पत्र र राजश्व संकलनको अवस्था राम्रै देखिएको छ । तर कार्यालयमा सेवा प्रदान गर्ने कर्मचारीको अवस्था भने दयनीय रहेको यातायात ब्यवस्था सेवा कार्यालय राजविराजका प्रमुख शशीप्रसाद यादवको भनाई छ । ‘१२ जनाको दरबन्दी रहेको ठाउँमा मात्र हामी चार जना छौं’, कार्यालय प्रमुख यादवले भने, ‘सेवाग्राहीको चाप र राजश्व संकलनको अवस्थामा सन्तोषजनक भएको अवस्थामा पनि पदपूर्ति नहुँदा कार्यसम्पादनमा समस्यामा हुने गरेको छ ।’

यता सेवा विस्तार गरेकोमा मधेस सरकारलाई स्थानीय अगुवाहरूले धन्यवादसँगै हालसम्म बिचौलियाको प्रयोग नदेखिएको र यो क्रमलाई कायम राख्दै स्वच्छढंगले सेवाप्रवाह हुनुपर्नेमा जोडसमेत दिएका छन् ।

‘म पनि दोश्रो पटक लाइसेन्स बनाउनकालागि परीक्षार्थी भएर आएको हुँ’, लाइसेन्स ट्रायल सेन्टरमै भेटिएका अधिवक्ता दुर्गानन्द चौधरीले भने, ‘अरु ठाउँजस्तो घुस लेनदेन देखिएन, यो क्रमलाई यथावत राख्दै सहजपूर्वक यसरी नै सेवाग्राहीको काम हुनुपर्छ ।’

मालपोत, यातायात, नापी जस्ता सरकारी कार्यालयको नाम सुन्न बित्तिकै घुस बिना कामै नहुने अयामा गनिन्छ । अहिले सुरुवाती चरणमै रहेका राजविराज यातायातले सेवा र राजश्व संकलनको अवस्था राम्रो रहेको अवस्थामा बिचौलियाको प्रयोग हुन नदिनेतर्फ सचेत रहनुसँगै दरबन्दी बमोजिम कर्मचारी पदपूर्ति गर्नेतर्फ सरोकारवालाको ध्यान पुग्नु जरुरी छ ।