सिरहाको गोलबजारमा घरभित्रै हत्या गरिएको अवस्थामा महिलाको शव फेला

सिरहा । सिरहाको गोलबजारमा आफ्नै घरभित्र  एक महिलाको शव फेला परेको छ । गोलबजार नगरपालिका ६ का महेन्द्र कुमार साहकी श्रीमती करिव ३५ वर्षीय अनिता कुमारी साहको धारिलो हतियार प्रयोगगरी हत्या गरिएको अवस्थामा शव फेला परेको हो ।

स्थानीय सिकिन्द्र साहको घर भाडामा लिएर पछिल्लो एक वर्षदेखि होटल सञ्चालन गर्दै आएको साह दम्पतीमात्र घरमा रहेको बेला धारिलो हतियारले गर्दन काटिएको अवस्थामा घरभित्र सुत्ने खाट नजीकै शव फेला परेको इलाका प्रहरी कार्यालय गोलबजारले जनाएको छ ।

राती अबेर अनिताको श्रीमान महेन्द्र आत्तिएर बाहिर आएको थाहापाएपछि छिमेकीले घटनाबारे जानकारी पाएका थिए । साह आत्तिएर बेहोस भएपछि छिमेकीले नै उनलाई अस्पताल पुर्याए लगतै घटनाबारे प्रहरीलाई जानकारी गराएको इलाका प्रहरी कार्यालय गोलबजारले जनाएको छ ।

घटनामा श्रीमान संकाको घेरमा रहेको बताइएको छ । उनीहरूको एक छोरी र दुई जना स–साना छोराहरू छन् ।