राजविराजमा भोलि देखि क्रिकेट क्लबहरू बिच प्रतियोगिता हुँदै

राजविराज । सप्तरीको राजविराजमा जिल्लास्तरीय क्रिकेट प्रतियोगिता आयोजना हुने भएको छ । आज मंगलबार नेपाल पत्रकार महासंघ शाखा सप्तरीको सभाहलमा पत्रकार सम्मेलन गरेर आयोजकले सो जानकारी गराएको हो ।

क्रिकेट विकास प्रतिष्ठान राजविराजको आयोजनामा बैशाख ५ गते देखि १२ गतेसम्म संचालन हुने प्रतियोगितामा जिल्ला स्तरीय क्रिकेट क्लबहरूको सहभागिता रहने प्रतिष्ठानका अध्यक्ष इ. इन्द्र नारायण देवले जानकारी दिए ।

पवि मावि राजविराजको खेलमैदानमा आयोजना हुने प्रतियोगितामा सबल नेपाल राजविराज, युथ एकेडेमी राजविराज, तिलाठी कोइलाडी गाउँपालिका, कंचनपुर रोयल रूपनगर, रुपनी राइडर्स, बजाज खड्ग यंग एलेवन, माँ काली छिन्नमस्ता, वाईइसि वरही विरपुर, राजदेवी राइजिंग गरि ९ टिम सहभागी हुने आयोजकले जनाएको छ । 

प्रतियोगिताको विजेता तथा उपविजेताले क्रमशः नगद २५ हजार र १५ हजार सहित ट्रफी, मेडल र प्रमाण पत्र प्राप्त गर्नेछन् प्रतिष्ठान का सचिव भोगेन्द्र चौधरीले जानकारी दिए ।  पत्रकार सम्मेलनमा सप्तरी क्रिकेट संघका उपाध्यक्ष निरज कुमार सिंह, प्रतिष्ठानकी सदस्य मिरा देव, शम्भु दासलगायतका उपस्थिति रहेको थियो । 

स्थानीय स्तरका खेलाडीहरूको प्रतिभा, क्षमतालाई विकास गर्दै राष्ट्रिय खेलाडीका रुपमा चिनाउने उद्देश्यका साथ २०७६ सालमा स्थापना भएको यस क्रिकेट विकास प्रतिष्ठानले ५ सालदेखि वार्षिक रुपमा निरन्तर क्रिकेट प्रतियोगिता आयोजना गर्दै आएको छ ।