सप्तरीको कंचनरुपमा भीषण आगलागी, १२ परिवारका २४ घर जलेर नष्ट

राजविराज । सप्तरीको कंचनरुप नगरपालिका-५ पडेमारास्थित दलित बस्तीमा भीषण आगलागी भएको छ ।

आइतबार  दिउँसो ३ बजेतिर बजे सुरु भएको आगलागीबाट १२ परिवारका २४ घर जलेका छन् । आगलागीमा घर जलेपछि दलित बस्ती बिचल्लीमा परेका छन् । 

जिल्ला प्रहरी कार्यालय सप्तरीका अनुसार आगलागीबाट लालमोहन सरदारको चार वटा घर, बिजुली सदारको तीन वटा, आसा सरदार, लालबहादुर सरदार, सुधिर सरदार, बिरबहादुर सरदार, श्यामबहादुर सरदार, रामबहादुर सरदार र बुटु सरदारको दुईदुईवटा तथा त्रिभुवन सरदार, करण चौधरी र समुन्द्री सरदारको एकएकवटा गरी २४ वटा घर जलेर नष्ट भएको छ ।

आगलागीबाट कतिपय पशुचौपाया पनि मरेको जनाइएको छ । यस्तै आगलागीमा परेर घरमा रहेका सबै धनमाल जलेर नष्ट हुँदा २४ लाख भन्दा बढि मूल्य बराबरको क्षति भएको प्रारम्भिक अनुमान गरिएको छ । 

मधेश प्रदेश प्रहरी तालिम केन्द्र राजविराज, हनुमाननगर कंकालिनी र कंचनरुप नगरपालिकाको वारुणयन्त्र, प्रहरी र स्थानीय बासिन्दाको सहयोगमा आगो नियन्त्रणमा लिइएको थियो ।  ।