सप्तरीमा पेस्ताेल सहित दुई जना पक्राउ

राजविराज । सप्तरीको खडक नगरपालिका वडा नम्बर -८ भदियाबाट प्रहरीले पेस्तोलसहित दुई जना युवकलाई पक्राउ गरेको छ ।

प्रहरीले उनीहरुको साथबाट पेस्तोल १ थान, पेस्तोलमा लाग्ने गोली २ राउण्ड र म्यागजिन २ थानसहित पक्राउ गरेको हाे ।

पक्राउ पर्नेहरूमा सप्तरीको सुरूङगा नगरपालिका वडा नम्बर -६ श्रीपुर बस्ने ४५ वर्षीय बिशेश्वर प्रसाद साह र काठमाडौं टोखा नगरपालिका-८ बस्ने ४२ वर्षीय बम बहादुर तामाङ रहेका छन् ।

इलाका प्रहरी कार्यालय कल्याणपुरबाट खटिएको प्रहरीले बोदेबर्साईनबाट बिसनपुरतर्फ जाँदै गरेको स.६ प ५९०८ नम्बरको मोटरसाइकललाई जाँच गर्ने क्रममा उनीहरूलाई उक्त हतियारसहित पक्राउ गरेको हो ।

यता साे सम्बन्धमा प्रहरीले आवश्यक अनुसन्धान गरिरहेको सप्तरी प्रहरीले जनाएकाे छ ।