राजगढमा गाउँपालिका अध्यक्षको हर्कतपछि पत्रकार असुरक्षित !

राजविराज । सप्तरीको राजगढ गाउँपालिकाका अध्यक्ष ओमप्रकाश मण्डल र उनका सहयोगीहरूले पत्रकारलाई कोठामा थुन्दै आक्रमणको प्रयास घटनापछि सप्तरीका पत्रकारहरू असुरक्षित भएका छन् । 

उक्त गाउँपालिकामा भइरहेको भ्रष्टाचार विरोधी आन्दोलनको समाचार संकलन गर्न गत मंगलवार पुगेका कान्तिपुर टेलिभिजनका सप्तरी संवाददाता एवं नेपाल पत्रकार महासंघ सप्तरीका सचिव आरएन विश्वास‚ महासंघका कोषाध्यक्ष एवं राजविराज दैनिकका उपसम्पादक नवीनकुमार गुप्ता र नेपाल समाचार पत्रका संवाददाता विद्यानन्द रामलाई गाउँपालिका अध्यक्ष मण्डलले प्रत्यक्षरूपमा प्रमुख प्रशासकीय अधिकृतको कार्यकक्षमा थुन्न लगाउँदै बुम माईक खोस्दै कुटपिटको प्रयास गराएको थियो । 

उक्त घटनापछि सप्तरीका पत्रकारहरू असुरक्षित महसुस गर्दै समाचार संकलनमा थ्रेट रहेको भन्दै नेपाल पत्रकार महासंघ सप्तरीको अगुवाईमा गाउँपालिका अध्यक्ष मण्डलसहित उक्त कार्यमा संलग्न रहेकाहरुमाथि कानून बमोजिम कारबाहीको माग लिखितरूपमै सप्तरीका प्रहरी उपरीक्षक गजुसिद्धी बज्रचार्यसमक्ष गरेका छन् । 

समाचार संकलनको क्रममा खाली रहेको कार्यकक्षको तस्विर भिडियो खिच्दा सिधै पालिका अध्यक्ष आएर हामी पत्रकारलाई किन भिडियो खिचेको‚ कसको अनुमति लिएर पालिका आएको भन्दै सिधैं कोठामा थुन्न लगाउँदै कान्तिपुरको बुम माईक खोसेर कुटपिटको प्रयास गराएपछि हामी असुरक्षित भएको र सुरक्षाको प्रत्याभूति मिलाउनसमेत सरकारसँग पीडितमध्येका पत्रकार विश्वासले माग गरे । 

यता उक्त गाउँपालिकाका बासिन्दाहरूले पत्रकारलाई समाचार संकलनमा कुनै किसिमको रोक लगाउनु अपराध भएको भन्दै पालिका अध्यक्ष मण्डलको निर्देशनमा पत्रकारमाथि भएको आक्रमणको विरोध गर्दै कारबाहीको माग गरिरहेका छन् ।

यसैबीच नेपाल पत्रकार महासंघका केन्द्रीय महासचिव रोशन पुरीले बिहीवार प्रेस विज्ञप्ति जारी गर्दै राजगढ गापाका अध्यक्ष मण्डलको उक्त हर्कतले प्रेस स्वतन्त्रतामा आघात पुग्नुका साथै प्रचलित कानूनको समेत उल्लङ्घन भएको ठहर गरेको छ ।

महासंघले उक्त घटनाको छानविन गरी दोषीउपर कानूनी कारबाहीको प्रक्रिया अगाडि बढाई प्रेसको संवैधानिक अधिकारको सम्मान गर्न सम्बन्धित निकायको ध्यानाकर्षणसमेत गराएको छ । 

यसअघि नेपाल पत्रकार महासंघ सप्तरी‚ मधेश प्रदेश सरकार मातहतका आमसञ्चार प्राधिकरण‚ प्रेस मञ्च नेपाल‚ नेपाल प्रेस युनियन‚ प्रेस फ्रिडम फोरम‚ सप्तरी युथ सहितकाले विज्ञप्ति जारी गर्दै पत्रकारमाथि भएको घटनामा संलग्न जो कोही माथि कारबाहीको माग गरिसकेका छन् ।