सप्तरीका रामविलास बाबाधाममा सम्पर्कविहीन

राजबिराज । भारतको बाबाधाम (देवघर) जल चढाउन गएका सप्तरीको राजगढ गाउँपालिका-३ स्थित पुर्बेली टोलका रामबिलास यादव सम्पर्कविहीन भएका छन् ।

अभिभावक नै सम्पर्कविहीन भएपछि उनको परिवारमा विचल्ली भएका छन् । गाउँका अन्य भक्तजनसँग मोटरसाइकलमा भारत झारखण्ड राज्यको देवघर (बाबाधाम) मा जल चढाउन गत आइतबार रामविलास प्रस्थान गरेका थिए । भोलि पल्ट सोमबार साथीहरुसंगै बाबाधाममा चल चढाएर घर फर्किने तयारी गर्दै गर्दा उनी सम्पर्कविहीन भएको सँगै गएका साथीहरूको भनाइ छ । 

फर्किनु अगाडि पण्डा (पुजारी) सित बिदा हुन साथीहरू गएका भए पनि घर फर्किन हतारिएका रामविलास भने आफू बस चढेर भए पनि घर फर्कि हाल्ने बताए पनि सँगै आएका कारण मोटरसाइकलमै फर्किने साथीहरूले उनलाई सल्लाह दिएका थिए । सोही सल्लाह अनुसार उनको झोला र मोबाइल समेत साथीहरुसंगै रहेको थियो ।

पण्डासित बिदा भएर लाँज फर्किदा रामविलास नभेटिँदा एक दिन रोकेर भए पनि साथीहरूले भारतीय प्रहरीलाई खोजबिन गरिदिन आग्रह गरेका थिए ।

भारतीय प्रहरी तथा देवघर मन्दिर समितिलाई पनि उनको फोटो र हुलिया दिएर खोजतलासका लागि आग्रह गरे पनि अहिलेसम्म कुनै खबर नआएको संगै गएका साथी शिवन यादवले बताए । रामविलास बेपत्ता भएपछि अहिले उनको परिवारजनमा रुवाबासी चलेको छ । छोरा विवेकले बुवाको खोजीका लागि पहल गरिदिन आग्रह गरेका छन् ।