Memo Khabar 
राजविराज । समाचार सङ्कलनको क्रममा राजगढ गाउँपालिकाका अध्यक्ष ओमप्रकाश मण्डलसहितका समुहले पत्रकारमाथि गरेको दुर्व्यवहार घटना विरोध गर्दै राजगढ गाउँपालिकामा बुधबार स्थानीयले धर्ना दिएका छन् ।
अध्यक्ष मण्डलसहित घटना संलग्न व्यक्तिलाई पक्राउ गरी अविलम्ब कारबाही गर्न माग राख्दै स्थानीयवासी गाउँपालिका अगाडि धर्ना बसेका हुन् । गत साउन २२ गते समाचार सङ्कलनका लागि गाउँपालिका आएका पत्रकारहरूलाई कोठामा बन्धक बनाएर दुर्व्यवहार गरेको घटनाको विरोधमा गाउँपालिका अगाडि धर्ना बसेको स्थानीय रमाकान्त यादवले बताए ।
पत्रकार दुर्व्यवहार घटनामा संलग्न अध्यक्ष मण्डलसहित घटनामा संलग्नहरूलाई पक्राउ गरी कारबाही गर्न दवाव स्वरुप धर्ना बसेको उनले बताए ।
गत साउन २२ गते यस राजगढ गाउँपालिका परिसरमा अध्यक्ष ओम प्रकाश मण्डललाई ज्ञापनपत्र बुझाउने क्रममा समाचार सङ्कलन गर्नका लागि आएका सञ्चारकर्मीहरूलाई अध्यक्ष मण्डललगायतकाले उल्टै दुर्व्यवहार गरेको घटनाप्रति घोर निन्दा गर्दछु, उनले भने, सूचना सम्प्रेषण गर्ने संचारकर्मीहरुप्रति भएका दुर्व्यवहारको घटनामा दुख व्यक्त गर्दै स्वतन्त्र प्रेसको सम्मान गर्न माग गर्दछु ।
हाम्रा मागहरू अविलम्ब सम्बोधनका लागि दवाव स्वरुप धर्ना कार्यक्रम सुरु गरेको बताउँदै उनले माग पूरा नभए अझ सशक्त आन्दोलनमा उत्रने चेतावनी समेत दिए ।
गत साउन २२ गते मंगलबार समाचार सङ्कलनका लागि गाउँपालिका पुगेका नेपाल पत्रकार महासंघ सप्तरीका सचिव एवम् कान्तिपुर टिभीका सप्तरी प्रतिनिधि रामनारायण विश्वास, नेपाल पत्रकार महासंघ सप्तरीका कोषाध्यक्ष एवम् राजविराज दैनिकका प्रकाशक नवीन कुमार गुप्ता, नेपाल पत्रकार महासंघ सप्तरीका कार्यसमिति सदस्य एवम् नेपाल समाचार पत्रका सप्तरी प्रतिनिधि विद्यानन्द रामलाई अध्यक्ष मण्डलसहितका समूहले प्रमुख प्रशासकीय अधिकृतको कक्षमा थुनेर, मायक खोस्नुकोसाथै हातपातसहित दुर्व्यवहार गरेका थिए ।
गाउँपालिकामा भएको विसङ्गति, वेतिथि तथा अवैधानिक रुपमा गरिएको १३ औं गाउँसभा खारेजीको माग गर्दै उपाध्यक्ष रेणु कुमारी मण्डलसहित बहुमत कार्यपालिका सदस्यसहित सम्पूर्ण गाउँबासी अध्यक्ष मण्डलको विरुद्ध चरणवद्ध सङ्घर्षरत रहेका छन् ।
उनीहरूको घोषित संघर्षका कार्यक्रम अन्तर्गत साउन ३० गते गाउँपालिका परिसरमा बिहान १० बजेदेखि ५ बजेसम्म धर्ना, भदौ २ गते गाउँपालिका कार्यालयमा तालाबन्दी, ५ गते अनियमितता सम्बन्धमा नाराजुलुस सहित विरोध प्रदर्शन गर्ने विरोधका कार्यक्रम रहेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |