२४ घण्टे अल्टिमेटम सहित प्रेस मञ्चले बुझायो अध्यक्ष श्रवण देवलाई ज्ञापन–पत्र  

राजविराज ।  प्रेस मञ्च नेपाल सप्तरीले राजगढ गाउँपालिकाका अध्यक्ष ओमप्रकाश मण्डलसहित समूहले पत्रकारमाथि गरेको आक्रमण घटनामा नेपाल पत्रकार महासंघ सप्तरी शाखाको आधिकारिक धारणा माग गरेको छ ।

जिल्ला अध्यक्ष भूषण कुमार सिंह नेतृत्वमा बुधबार महासंघ पुगेका मञ्च आवद्ध पत्रकारहरूले अध्यक्ष श्रवण कुमार देवलाई ज्ञापनपत्र बुझाउँदै उक्त माग गरेका हुन् ।

पत्रकारलाई दुर्व्यवहार गर्ने राजगढ गाउँपालिका अध्यक्ष मण्डलसहितका संलग्न माथि जाहेरी दर्ता सन्दर्भ महासंघले लिखित रुपमा आधिकारिक धारणा  सार्वजनिक गर्नुपर्ने मञ्चले बुझाएको ज्ञापनपत्रमा जोडदार माग गरिएको छ ।  ज्ञापनपत्रमा ४८ घण्टा भित्र लिखित रुपमा आधिकारिक धारणा जानकारी नगराए महासंघको कार्यालयमा तालाबन्दी सहित चरणबद्ध सशक्त आन्दोलनमा उत्रिनु बाध्य हुने चेतावनी समेत दिइएको छ ।  यसबाट उत्पन्न हुने  सम्पूर्ण परिस्थितिको जिम्मेवारी महासंघले  लिनुपर्ने समेत ज्ञापनपत्रमा भनिएको छ ।

अध्यक्ष सिंहले हस्ताक्षर गरेको ज्ञापनपत्रमा भनिएको छ,”सञ्चारकर्मको क्रममा पत्रकारहरूको सञ्चार उपकरण खोस्ने, अभद्र व्यवहार गर्ने लगायतका कार्यलाई प्रेस मञ्च नेपालले गम्भीरतापूर्वक लिए पनि हालसम्म पत्रकार महासंघकै अगुवाईमा यस मुद्दालाई कानूनी निष्कर्षमा पुर्‍याउने विश्वासका साथ अघि बढिरहेको व्यहोरा सर्वविदितै छ, ज्ञापनपत्रमा अगाडि भनिएको छ, “यद्यपि, दुई साता बितिसक्दा पनि सप्तरी प्रहरीले जाहेरी दर्ता नगरेको तथा जाहेरी दर्ता गराउनेतर्फ पत्रकार महासंघ समेत मौन देखिएको हुँदा पीडित पत्रकारहरूलाई न्याय, पत्रकारको आत्मसम्मानको रक्षा र प्रेस स्वतन्त्रताका निम्ति प्रेस मञ्च नेपाल चरणबद्ध दबाबमूलक कार्यक्रम अघि बढाउन अग्रसर भएको जानकारी गराउन चाहन्छौँ ।” 

गत साउन २२ गते समाचार संकलनका लागि राजगढ गाउँपालिका पुगेका नेपाल पत्रकार महासंघ सप्तरीका सचिव एवम् कान्तिपुर टिभीका सप्तरी प्रतिनिधि रामनारायण विश्वास, कोषाध्यक्ष एवम् राजविराज दैनिकका  प्रकाशक नवीन कुमार गुप्ता  र कार्यसमिति सदस्य एवम् नेपाल समाचार पत्रका प्रतिनिधि विद्यानन्द रामलाई अध्यक्ष मण्डलसहितका  समुहले कोठामा बन्धक बनाएर माइक खोस्नुको साथै दुर्व्यवहार गरेका थिए ।