पत्रकार महासंघ सप्तरीमा प्रेस मञ्च नेपालले गर्यो अनिश्चितकालीन तालाबन्दी

राजविराज ।  राजगढ गाउँपालिका अध्यक्ष ओम प्रकाश मण्डलसहितका समुहले पत्रकारमाथि दुर्व्यवहार गरेको घटनामा नेपाल पत्रकार महासंघ सप्तरी शाखाका अध्यक्ष श्रवण कुमार देवले महासंघलाई अनिर्णयको बन्दी बनाई मौनता साधेको आरोप लगाउदै प्रेस मञ्च नेपाल सप्तरीको नेतृत्वमा पीडित पत्रकार र महासंघका पदाधिकारीहरूले शुक्रवार महासंघ सप्तरी शाखामा तालाबन्दी गरेका छन् ।

प्रेस मञ्च नेपालका अध्यक्ष भूषण कुमार सिंहको नेतृत्वमा नेपाल पत्रकार महासंघ सप्तरीका उपाध्यक्ष बैद्यनाथ यादव, पीडित समेत रहेका सचिव रामनारायण विश्वास तथा कार्यसमिति सदस्य विद्यानन्द रामले अध्यक्षको मौनताको विरोध गर्दै महासंघको कार्यालयमा अनिश्चितकालीन तालाबन्दी गरेको प्रेस मञ्च नेपाल सप्तरीले जनाएको छ ।

समाचार संकलनका क्रममा राजगढ गाउँपालिकामा पत्रकारमाथि भएको घटनालाई लिएर  साउन २३ गते महासंघ अध्यक्ष देवको अध्यक्षतामा बसेको पत्रकारहरूको वृहत बैठकको निर्णय बमोजिम घटनामा संलग्नमाथि कारबाही गर्न माग गर्दै जिल्ला प्रहरी कार्यालय सप्तरीमा जाहेरी दिएको हप्तौंसम्म दर्ता नहुँदा समेत अध्यक्ष मौन बसेकोले बाध्य भएर आफ्नै नेतृत्व विरुद्ध सङ्घर्षमा जानू परेको  महासंघका उपाध्यक्ष यादवले बताए ।

यस विषयमा अध्यक्ष देवसहित महासंघ पदाधिकारीसंग पटकपटक छलफल गर्दा गम्भीर नदेखिएकोले पत्रकारहरूको सुरक्षा र अस्तित्व रक्षाका लागि संघर्षमा उत्रिनु परेको प्रेस मञ्च नेपाल सप्तरीका अध्यक्ष सिंहले जानकारी दिए । पीडित पत्रकार र महासंघले प्रहरीलाई बुझाएको जाहेरी दर्ता नभएसम्म आन्दोलन जारी रहने उनले बताए ।  जाहेरी दर्ताका लागि दवाव स्वरुप प्रहरी विरुद्ध थप सङ्घर्षका कार्यक्रम घोषणा गरी सशक्त आन्दोलनमा उत्रिने अध्यक्ष सिंहले बताए ।