Memo Khabar 
राजविराज । सप्तरी प्रहरीले राजगढ गाउँपालिका- ४ बाट बालुवा र गिटी लोड भएको ट्रिपर बाट १७ क्विन्टल गाँजा सहित टिपर र चालकलाई नियन्त्रणमा लिएको छ ।
पक्राउ पर्नेमा धनकुटाको शहीद भूमी गाउँपालिका- ३ बस्ने चालक यमजित राई छन् । उनले को.१ ख ६५०३ नम्बरको ट्रिपरमा गाँजा राखेर भारततर्फ गइरहँदा राजगढ गाउँपालिका- ४ स्थित बेल्ही चपेना बाट उनलाई पक्राउ गरिएको सप्तरी प्रहरीका प्रमुख एसपी ढकेन्द्र खतिवडाले जानकारी दिए ।
उक्त क्षेत्रमा बालुवा गिटी भण्डारण गरी राख्ने र भारततर्फ चोरी तस्करी हुने गरेको सुराकीको आधारमा चेकजाँच गर्ने क्रममा गाँजा भेटिएको सप्तरी प्रहरीले जनाएको छ ।
ट्रकमा बालुवा लोड गर्दा तल गाँजा राखेर भारततर्फ लग्ने योजना अनुरूप जाँदै गर्दा गोप्य सूचनाका आधारमा प्रहरीले चेक गर्दा १७ क्विन्टल ३६ किलो गाँजा फेला परेको प्रहरीले बताए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |