कंचनरूप मेयर कपको उपाधि राजबिराजको कब्जामा

कंचनपुर, सप्तरी । कंचनरूप नगरपालिका द्वारा संचालित पालिकास्तरिय मेयर कप दोस्रो सिजनको उपाधि राजबिराज नगरपालिकाले सुरूगां नगरपालिकालाई ३७ रनले पराजित गर्दै उपाधि माथि कब्जा जमाएको छ ।

उपाधी सँगै राजबिराज नगरपालिकाले १ लाख १ हजार र उपविजेता सुरूगां नगरपालिकाले ५५ हजार नगद प्राप्त गरेको छ  । राजबिराज नगरपालिकाले दिएको १ सय ४४ रनको लक्ष्य पछयाउने क्रममा सुरूगां नगरपालिकाले १८ ओभर १ बलमा सबै बिकेट गुमाएर १ सय ७ रन मै सीमित भएको थियो।

जसमा शंभु मण्डल र जेनिष पासवानले २१/२१ रन बनाएका थिए, यसैगरी ओमप्रकाश चौधरी २० रन र कर्ण बहादुर बिकले १५ रन बनाएपनि टिमको लागी जित प्रयाप्त भएन । बलिंग तर्फ राजबिराजका अभिषेक कार्की ४ बिकेट, नितेश यादब ३ बिकेट सोहिल आलम, मोहम्मद सकिम, बिकास दासले १/१ बिकेट हात पारेका थिए ।

शनिवार राजबिराज नगरपालिका र सुरूगां नगरपालिका बिच भएको फाईनल खेलमा टस जितेर राजबिराजले ब्याटिंग गर्दै निर्धारित २० ओभरमा १९ ओभर ६ बलमा सबै बिकेट गुमाई १ सय ४४ रनको योगफल खडा गरेका थिए । जसमा बिकास दासले उत्कृष्ट ब्याटिगं गर्दै ५ छक्का र २ चौक्काको मदतले ४१ रन बनाएका थिए । त्यस्तै नितेश यादब १९ रन, सदाम आलम १८ रन, बिजय यादब १६ रन जोडेका थिए ।

बलिंग तर्फ सुरूगांका शंभु मण्डल र बिकेश चौधरी ३र३ बिकेट र ओम प्रकाश चौधरीले २ बिकेट तथा कर्ण बहादुर बिकले १ बिकेट लिएका थिए । खेलको प्लेयर अफ द फाईनल अभिषेक कार्की घोषित भएका थिए ।

उक्त खेलमा प्लेयर अफ दि सिरिज राजबिराजका बिकास दास, बेस्ट बलर  सुरूगां नगरपालिकाका बिकेश चौधरी, बेस्ट ब्याटर हनुमाननगर कंकालनीका गोमान्नद अमात्य तथा अनुसासित टिम तिलाठीकोईलाडी गाउपालिका घोषित भएको छ c।

उक्त अवसरमा बिजेता तथा उपबिजेतालाई कंचनरूप नगरपालिकाका नगरप्रमुख ललन प्रसाद गुप्ता, सुरूगां नगरपालिका गिता चौैधरी, कंचनरूप नगरपालिका उपप्रमुख मुन्ना कुमारी पोखरेल प्रशासकिय अधिकृत सुनिल कुमार पासवान, सुरूगां नगरपालिका वडा ९ का वडा अध्यक्ष सन्त यादब, ईन्जिनियर ईन्द्र नारायण चौधरी लगायतले शिल्ड, कप, मेडेल, प्रमाणपत्र प्रदान गरेका थिए।

उक्त प्रतियोगितामा कंचनरूप नगरपालिकाको आयोजना तथा  सप्तरी क्रिकेट सँघको समन्वयमा जिल्लाको ९ वटा पालिकाले सहभागिता रहेको थियो ।