स्ववियु निर्वाचन : निर्वाचनको तयारी अन्तिम चरणमा

राजबिराज । त्रिभुवन विश्वविद्यालय अन्तर्गत स्वतन्त्र विद्यार्थी युनियन निर्वाचनको मिति अत्यन्त नजिक पुगे सँगै यहाँ स्थित  महेन्द्र विन्देश्वरी बहुमुखी (मविब) क्याम्पस राजबिराजको निर्वाचनको तयारी अन्तिम चरणमा पुगेको छ ।

मविब क्याम्पस राजबिराजका स्ववियु निर्वाचन प्रमुख नन्दकिशोर यादबको अनुसार यसपालीका स्ववियु निर्वाचनलाई  स्वच्छ र निष्पक्ष बनाउन, विद्यार्थी, अभिभावक तथा राजनीतिक दलहरूलाई संयमित भई निर्वाचन प्रक्रिया सम्पन्न गर्न आग्रह गर्नु भएको छ ।

विद्यार्थीहरूको सक्रिय सहभागितालाई सुनिश्चित गर्नुपर्ने भन्दै निर्वाचन आचारसंहिताको पूर्ण पालना गर्न सबै पक्षलाई आग्रह गरेको छ । चैत ५ मङ्गलवार गते हुने स्ववियु निर्वाचनबाट राजनीतिक दलदेखि विद्यार्थी सङ्गठन सम्म उत्साही भएका छन् ।

यता बिभिन्न विद्यार्थी सङ्गठनहरूले आफनो पक्षमा मत ल्याउन अन्तिम कसरतमा रहेको छ । यता मबिव क्याम्पसको अध्यक्ष पदमा समाजवादी विद्यार्थी युनियनका रंजित यादब, नेबि सँघका नितिश कुमार यादब र अनेरास्ववियुका मनिषा कुमारी साह, जनमत विद्यार्थी सँघका त्रिवेणी कुमार यादब र स्वतन्त्र वाट बिनय कुमार यादबको प्यानल चुनावी प्रतिस्पर्धा रहेको छ ।

विद्यार्थी हकहित सँगै क्याम्पसको शैक्षिक सुधार, नियमित कक्षा संचालन, गुणस्तिर शिक्षा तथा भौतिक पूर्वाधारमा सुधार ल्याउने जस्ता एजेण्डा राखेर विद्यार्थी संगठनहरू चुनावी प्रतिस्पर्धामा उतरेका छन । उम्मेदवारी दर्तादेखि नै उत्साहपूर्ण रुपमा लागेका विद्यार्थी सङ्गठन आइतबार हुने निर्वाचनका लागि झनै उत्साही भएका छन । उनीहरु अहिले आफ्नो पक्षमा माहोल बनाउन लागिपरेका छन् ।

विश्वविद्यालयमा अध्ययनरत विद्यार्थी र तिनले आन्दोलनमार्फत गरेका सहमति कार्यान्वयन गर्न, क्याम्पस तथा विश्वविद्यालयको नीति निर्माण र कार्यान्वयनमा विद्यार्थी प्रतिनिधित्व सुनिश्चित गर्न, क्याम्पसमा शैक्षिक वातावरण कायम गर्न र विद्यार्थीको चौतर्फी विकासका लागि स्ववियु निर्वाचन हुँदै आएको छ । विसं २०७३ मा पहिलो पटक मिश्रित निर्वाचन प्रणाली र २८ वर्षे उमेर हदबन्दी लगाएर निर्वाचन भयो । २०७३ देखि स्ववियु निर्वाचन मिश्रित प्रणालीमा हुन थालेको छ ।  यसपटक पनि स्ववियु निर्वाचन मिश्रित निर्वाचन प्रणालीमा हुन थालेको हो । 

अध्यक्ष, सचिव र कोषाध्यक्ष तथा ५० प्रतिशत सदस्य प्रत्यक्ष निर्वाचन प्रणाली र उपाध्यक्ष, सहसचिव र ५० प्रतिशत सदस्य समानुपातिक निर्वाचन प्रणालीबाट निर्वाचित हुनेछन् । यस्तै स्ववियु निर्वाचनमा उम्मेदवारका लागि उमेर हदबन्दी तोकिएको छ ।

विसं २०५१ चैत २८ गतेपछि जन्मिएका विद्यार्थी मात्र उम्मेदवार हुन पाउने व्यवस्था गरिएको छ । पानीका बोतल, पेट्रोल, डिजेल, मादक पदार्थ, औषधिजन्य वस्तु, सिसाका बोतल, रङ्ग, मसी मतदानस्थलमा लैजान निषेध गरिएको छ ।

यस्तै, मोबाइल, क्यामेरा, झोला, लौरो, हेलमेट, चाबी, लाइटर, सलाई, नङकट, धारिलो हतियार, भाला, खुकुरी, चक्कु, छुरी जस्ता वस्तु मतदानस्थलमा लैजान प्रतिबन्ध गरिएको छ । स्ववियु निर्वाचनका लागि मतदानको समय आइतबार बिहान ८ देखि दिउँसो ४ बजेसम्म तोकिएको छ ।