गाँजा बोकेको २ वटा सवारीसाधन सहित ओसारपसारमा संलग्न १ जना पक्राउ

सप्तरी । सप्तरी प्रहरीले छुट्टाछुट्टै ठाउँबाट लागूऔषध गाँजा बोकेको २ वटा सबारीसाधन सहित ओसारपसारमा संलग्न १ जनालाई पक्राउ गरेको छ । 

बुधबार बिहान ३ बजे भित्री सडकखण्ड अन्तर्गत तिरहुत गाउँपालिका-२ बडाहरा स्थित उत्तरबाट दक्षिण तर्फ जाँदै गरेको प्र १-०२-००३-ह २९३४ नम्बरको अटोमा शङ्का लागि प्रहरीले चेकजाँच गर्दा बोरा बाहेक ५८ केजी प्रतिबन्धित लागूऔषध  गाँजा बरामद गरेको हो । 

बरामद गाँजा तथा अटो चालक उदयपुर बेलका नगरपालिका-३ का ४१ वर्षीय जयराम दाहाललाई इलाका प्रहरी कार्यालय कंचनपुरको हिरासतमा राखी आवश्यक कारबाही अगाडि बढाइएको जिल्ला प्रहरी कार्यालय सप्तरीले जनाएको छ ।

यस्तै वैशाख १६ गते मंगलबार राति पूर्वपश्चिम लोकमार्ग अन्तर्गत सप्तरीको कञ्चनरुप नगरपालिका वडा नम्बर-२ बरमझियाबाट इलाका प्रहरी कार्यालय कञ्चनपुरबाट खटिएको प्रहरी टोलीले स.१.ह. १७१६ नम्बरको अटोमा शङ्का लागी रोक्न खोज्दा चालक अटो छाडेर फरार भएका थिए ।

अटो नियन्त्रणमा लिएर जाँच गर्दा त्यसमा ३ ओटा बोरा, १ कालो सुटकेस र १ रातो झोलाभित्र ७८ किलो ७६ ग्राम लागूऔषध गाँजा फेला परेको जिल्ला प्रहरी कार्यालय सप्तरीका प्रवक्ता तथा सुचना अधिकारी डीएसपी  जितेन्द्र कुमार बस्नेतले जानकारी दिए ।  

बरामद गरिएको अटो र गाँजा  इलाका प्रहरी कार्यालय कञ्चनपुरमा राखिएको छ भने फरार चालकको खोजी जारी राखिएको तथा थप अनुसन्धान भइरहेको डीएसपी बस्नेतले जानकारी दिए ।