गजेन्द्रनारायण सिंह औद्योगिक क्षेत्रमा श्री सीताराम नाम महायज्ञ सुरु 

राजबिराज । गजेन्द्र नारायण सिह औद्योगिक क्षेत्रमा  पहिलोपटक श्री सीताराम नाम १००८ मण्डलीय सकिर्तन एवं श्री रामचरित्र मानस ९ दिवसीय महायज्ञ सुरु भएको छ ।

गजेन्द्रनारायण सिंह औद्योगिक क्षेत्रमा उद्योग कलकारखाना संचालनमा ल्याउन नेपालमै दोस्रो पटक सुरु भएको यज्ञकर्ता श्री श्री १००८ श्री जगत नन्दन दास जी महाराज (पगला बाबा) ले बताए । 

औद्योगिक क्षेत्रको जमिनमा रहेको दोषबाट मुक्ति दिलाउन शुद्धीकरण स्वरुप यो महायज्ञ आयोजना गरिएको यज्ञयकर्ता पगला बाबाले जानकारी दिए ।

विश्व शान्ति, एकता, अखण्डता एवं सुदृढ नेपालका लागि जगत जननी जानकी माताको जन्मोत्सवको पावन अवसरमा  बैशाख २१ गते आइतबार देखी ९ दिन सम्म महायज्ञ संचालनमा रहने बताईएको छ ।

करिब ३ करोड ३६ लाख अनुमानित लागत खर्च हुने यस महायज्ञमा एक हजार आठ मण्डपमा कीर्तन मण्डली, हनुमान आराधना मण्डली, वृन्दावनको रासलीला, रामलीला, रामचरित्र मानस पाठ, उच्चकोटी विद्वान्द्वारा प्रवचन तथा विशाल भण्डारा समेतको व्यवस्थापन रहने पगला बाबाले जानकारी दिए ।

महायज्ञलाई सफल बनाउन सप्तरीका १८ वटै स्थानीय निकाय, जिल्ला प्रशासन कार्यालय सप्तरी, सुरक्षा निकाय लगायत सम्पूर्ण सप्तरीवासी लाई तन, मन, धनले आवश्यक सहयोग गरी सम्पन्न गर्न रुपनी गाउँपालिका अध्यक्ष दिनेश कुमार यादवले आग्रह गरेको छ ।

२०५६ सालमा धनुषामा पहिलोपटक यस्तो प्रकृतिको महायज्ञ भएको थियोे र दोस्रो पटक अहिले सप्तरीमा हुन गइरहेको जानकारी गराउँदै यस महायज्ञलाई सफल बनाउन विभिन्न ९ वटा समिति उपसमिति बनाइएको छ ।