राजविराज बसपार्कको सम्पूर्ण तयारी पूरा, एक हप्ताभित्र उद्घाटन हुने

राजबिराज । वर्षौको प्रतीक्षा पछि राजविराज बसपार्क संचालनमा आउने भएको छ । राजबिराज नगरपालिकाले स्थलगत अनुगमन गर्दै एक हप्ता भित्रै बसपार्क उद्‌घाटन गर्ने तयारी रहेको छ । 

सोमवार राजबिराज नगरपालिका कावा नगरप्रमुख ईसरत परविनको अगुवाईमा तथा प्रमुख जिल्ला अधिकारी भोला दहाल सहित सरोकारवाला निकायहरूको टोलीले स्थलगत निरीक्षण गर्दै बसपार्क सुचारू गर्न सम्पूर्ण तयारी पूरा भएको बताईएको छ ।

यता कावा नगरप्रमुख ईसरत परविनले राजविराज बसपार्कको स्थलगत अवलोकन तथा निरीक्षण कार्य सम्पन्न भइसकेकोले उदघाटनका लागि आवश्यक तयारीहरू अन्तिम चरणमा पुगेका बताए । राजबिराज बसपार्क संचालनका लागि कार्य विधि बनाएर एक हप्ता भित्र बसपार्क उद्‌घाटन गरिने बताइन ।

बसपार्क संचालनमा आएपछि बर्षो देखि  राजबिराज नगरको मुख्य सडकमा देखिएको चाप सँगै बजारको अस्तव्यस्त अवस्थामा सुधार हुने कावा प्रमुख परविनको भनाई छ । सहरी विकास मन्त्रालयको १७ करोड रुपैयाँको लागतमा राजविराज बसपार्क निर्माण गरिएको छ ।

२०७७ पुस १८ भित्र सम्पन्न गर्नेगरी काठमाडौंको कुलेश्वरस्थित सिनर्जी विल्डर्स प्रालिले निर्माणको ठेक्का लिएको थियो।

सघन शहरी तथा भवन निर्माण आयोजना कार्यालय राजबिराजले गत बैशाख २३ गते एक कार्यक्रम राजबिराज नगरपालिका कावा नगरप्रमुख ईसरत परविनलाई राजबिराज बसपार्क हस्तान्तरण गरिसकेको छ ।

 बसपार्कमा सेड, घन्टाघर, भित्री सडक, सर्भिस सेन्टर, शौचालय, टर्मिनल भवन तथा बाउन्ड्री वालसमेत गरी १६ करोड ३८ लाख ९६ हजार ५ सय १९ रुपैयाँ (भ्याटबाहेक) को योजना थियो ।