धोखाधडीमार्फत आईडियलबाट १ करोड ऋण, ऋणी बेखबर, लिलामी प्रक्रिया सुरु

राजविराज । सहकारी संस्थाहरूमा पारदर्शिता र ऋण निकासामा कानुनी प्रक्रिया पालना नहुनाले सर्वसाधारण ठगिन थालेका छन् ।

सप्तरीको विष्णुपुर गाउँपालिका–६ निवासी शम्भु देवी यादवले आफूलाई झुक्याएर जेठो छोरा  शिव कुमार यादवले सहकारी संस्थाबाट १ करोड रुपैयाँ निकालेको आरोप लगाएकी छन् ।

नेपाल पत्रकार महासंघ सप्तरीमा सोमबार आयोजित पत्रकार सम्मेलनमा शम्भु देवीले आईडियल सहकारी संस्था लिमिटेडमार्फत घरजग्गा धितो राखी उक्त ऋण निकालिएको तर आफूलाई जानकारी नदिइ सादा कागज र चेकमा हस्ताक्षर गराइएको बताइन् ।

उनीसँगै उपस्थित कान्छो छोरा सचिन यादवले आफ्नो समेत अंश रहेको सम्पत्तिमा धोखाधडीपूर्वक धितो राखिएको भन्दै आक्रोश व्यक्त गरे । “म विराटनगरमा अध्ययनरत हुँदा कुनै जानकारी नै नदिइ दाजुले यो कार्य गरे,” उनले भने ।

सहकारीबाट १ करोड ऋण आमा शम्भु देवीको नाममा स्वीकृत भई सोही दिन ९० लाख रुपैयाँ जेठो छोरा शिव यादवको खातामा ट्रान्सफर भएको विवरण देखिएको छ । सहकारी संस्थाले अब लिलामी प्रक्रिया अघि बढाएको छ ।

यता, सहकारीका अध्यक्ष गणेश कुमार आसले ऋण सहमतिमा लिएको र प्रक्रिया अनुसार लिलामी अघि बढाइएको दाबी गरे । तर, कानुनी पारदर्शिता, ऋणीको संरक्षण र सदस्यीय सहमतिमा आधारित सहकारी प्रणालीको चरम कमजोरी यस घटनाले उजागर गरेको छ ।

सहकारी नियमन प्राधिकरण र स्थानीय सरकारको कमजोरीले यस्ता विवाद दोहोरिइरहँदा सर्वसाधारणको विश्वास डगमगाउन थालेको देखिन्छ ।