सप्तरीमा शिलान्यासको लहर : विकासका सपना, तर शिलान्यासपछि कामको अनिश्चितता

सप्तरी । जेठ महिनाको सुरुवातसँगै जिल्लामा शिलान्यास कार्यक्रमको लहर नै चलेको छ । स्थानीय तहदेखि प्रदेश तथा संघीय प्रतिनिधिहरूले विभिन्न योजना, संरचना तथा पूर्वाधार विकासका परियोजनाको शिलान्यास गर्दै ‘विकासको नयाँ युग सुरु भएको’ घोषणा गरेका छन् ।

गाउँदेखि नगरसम्मका सडक, पुल, भवन, खानेपानी तथा स्वास्थ्य सेवा केन्द्र इत्यादी शिलान्यास समारोह धुमधामका साथ सम्पन्न भइरहेका छन् । यस्ता कार्यक्रमहरूले स्थानीयमा केही हदसम्म उत्साह थपेको भए पनि भदौ महिनासँगै यी योजनाहरू कुन चरणमा पुग्ने हुन् भन्नेमा धेरैजसो जिल्लावासी सशंकित देखिन्छन् ।

स्थानीय एक जना नागरिक भन्छन्, हरेक वर्ष योजना आउँछ, शिलान्यास हुन्छ, तर निर्माणको काम सुरु हुन नपाउँदै वर्ष बित्छ । गत वर्ष शिलान्यास गरिएका धेरैजसो योजना अहिलेसम्म पनि निर्माणको सुरुवात नभएको तथ्यांक सार्वजनिक भइरहेका छन् । यस्ता योजनाहरू कागजमा मात्र सीमित रहने हो कि भन्ने चिन्ता यसपटक पनि उठ्न थालेको छ ।

सरोकारवाला निकायले योजनाहरूलाई समयमै कार्यान्वयन गर्ने प्रतिबद्धता जनाएका छन् । तर योजना शिलान्यासमा सीमित हुने हो कि वास्तवमै सप्तरी विकासको बाटोमा अघि बढ्नेछ, जनता अझै पर्ख र हेरको स्थितिमा छन् ।