राजविराजमा सहिद कृष्णसेन इच्छुकको २३ औँ स्मृति दिवसमा दीप प्रज्वलन 

राजविराज  ।  महान सहिद कृष्णसेन इच्छुकको २३ औँ स्मृति दिवसको अवसरमा मगलबार साँझ राजविराजको दशन चौकमा दीप प्रज्वलन गरिएको छ । प्रेस सेन्टर नेपाल सप्तरीका अध्यक्ष  विन्दु कुमार यादवको नेतृत्वमा दीप प्रज्ज्वलन गरिएको हो । 

कार्यक्रममा नेपाल पत्रकार महासंघ सप्तरीका अध्यक्ष श्रवण कुमार देव, प्रेस स्वतन्त्रता सेनानी तथा प्रेस सेन्टर नेपालका केन्द्रीय सदस्य देवराम यादव,  प्रेस मञ्च नेपालका केन्द्रीय सदस्य बृजमान तामाङ,समाजवादी प्रेस संगठनका केन्द्रीय सदस्य नर्मदेव यादव, आदिवासी जनजाति पत्रकार महासंघ सप्तरीका अध्यक्ष कृष्ण कुमार मण्डल धानुक, प्रेस मञ्च सप्तरीका निवर्तमान अध्यक्ष भुषण कुमार सिंह, नेकपा (माओवादी केन्द्र) का जिल्ला सदस्य विनोद यादवसहित  प्रेस सेन्टरमा आवद्ध पत्रकारहरूको  उपस्थिति रहेको थियो ।

सहिद कृष्णसेन इच्छुक नेपाली पत्रकारिता र क्रान्तिकारी आन्दोलनका एक अमर पात्रका रूपमा स्मरण गरिन्छन् । प्रेस स्वतन्त्रता, अभिव्यक्ति स्वतन्त्रता र सामाजिक न्यायका पक्षमा दृढताका साथ कलम चलाउँदा २०५९ साल जेठ १३ गते तत्कालीन सत्ताले उहाँको हत्या गरेको थियो ।