काभ्रेमा बोलेरो र ट्रक ठोक्किँदा सप्तरीका एक बालकसहित तीन जना घाइते

राजविराज । शनिबार बिहान काभ्रेको धुलिखेलमा भएको सवारी दुर्घटनामा सप्तरीका एक बालकसहित तीन जना घाइते भएका छन् ।

धुलिखेल नगरपालिका-११, पात्लेखेतस्थित बीपी राजमार्गमा काठमाडौँबाट सप्तरीतर्फ जाँदै गरेको बा १९ च २८८८ नम्बरको बोलेरो र झापाबाट काठमाडौँतर्फ आउँदै गरेको ना. ७ ख. ३९९१ नम्बरको ट्रक एक आपसमा ठोक्किएर दुर्घटना भएको हो ।

दुर्घटनामा बोलेरोमा सवार सप्तरीको शम्भुनाथ नगरपालिका- १ निवासी ४० वर्षीया ललिता चौधरी, ३५ वर्षीया बबिता चौधरी र उनका ७ वर्षीय छोरा प्रभास चौधरी घाइते भएको काभ्रे प्रहरीले जनाएको छ । घाइतेहरूको धुलिखेल अस्पतालमा उपचार भइरहेको बताइएको छ ।