पविमाबिमा खेलाडी पेभिलियन भवन निर्माण हुँदै, आषाढ पहिलो साता सम्पन्न गर्ने लक्ष्य

राजविराज । पब्लिक विन्देश्वरी माध्यमिक विद्यालय, राजविराजस्थित पविमाबि क्रिकेट मैदान परिसरमा खेलाडीहरूको सुविधाका लागि खेलाडी पेभिलियन भवन निर्माण कार्य तीव्र रूपमा अघि बढिरहेको छ ।

प्रदेश सरकारको २५ लाख रुपैयाँको सहयोगमा निर्माणाधीन यस भवनले क्रिकेट खेलाडीहरूका लागि बस्न, ड्रेस लगाउन तथा विश्राम गर्न अत्यावश्यक पूर्वाधार उपलब्ध गराउनेछ । भवनमा ड्रेसिङ रुम, हल, र शौचालयको व्यवस्था गरिने छ । खेलाडी पेभिलियनको अभावका कारण प्रतियोगिता सञ्चालनमा आइरहेको समस्याको समाधानका लागि यो भवन उपयोगी हुने अपेक्षा गरिएको छ । 

खेलकुद तथा पूर्वाधार मन्त्रालयको सहयोगमा निर्माण भइरहेको यो भवन स्थानीय उपभोक्ता समितिमार्फत निर्माण गरिँदैछ । निर्माण कार्य आषाढको पहिलो साता भित्रै सम्पन्न गर्ने लक्ष्य राखिएको छ ।

स्थानीय खेलाडी तथा खेलप्रेमीहरूले पेभिलियन भवनको निर्माणलाई स्वागत गर्दै यसले राजविराजमा खेल गतिविधिको प्रवर्द्धनमा सकारात्मक प्रभाव पार्ने विश्वास व्यक्त गरेका छन् ।