एसएसपी भट्टराईको बिदाइ, १६ महिनाको कार्यकालपछि काठमाडौं सरुवा

राजविराज । मधेश प्रदेश प्रहरी तालिम केन्द्र जनकपुर अन्तर्गत सम्पर्क कार्यालय राजविराजका प्रमुख वरिष्ठ प्रहरी उपरीक्षक (एसएसपी) गोपाल चन्द्र भट्टराईको बिदाइ गरिएको छ ।

बिहीबार एक विशेष कार्यक्रमकाबीच सप्तरीका प्रमुख जिल्ला अधिकारी भोला दाहालले एसएसपी भट्टराईलाई फूलमाला, खादा र मायाको चिनो प्रदान गर्दै सफल कार्यकालको शुभकामना सहित बिदाइ गरे ।

भट्टराई १६ महिनासम्म राजविराजस्थित प्रहरी तालिम केन्द्रमा कार्यरत रहेपछि हालै प्रहरी मुख्यालय, काठमाडौं सरुवा भएका हुन् ।

बिदाइ कार्यक्रममा जिल्ला प्रहरी कार्यालय सप्तरीका प्रमुख प्रहरी उपरीक्षक ढकेन्द्र खतिवडा, राष्ट्रिय अनुसन्धान विभाग राजविराजका प्रमुख सुरेन्द्र कोइराला, राजविराज नगरपालिकाका निमित्त प्रमुख प्रशासकीय अधिकृत निरञ्जन यादव, जिल्ला प्रशासन कार्यालयका प्रशासकीय अधिकृत जितेन्द्र पासवान लगायत अन्य प्रशासनिक कर्मचारीहरूको उपस्थिति थियो।

कार्यक्रममा सहभागीहरूले एसएसपी भट्टराईको प्रशंसा गर्दै आगामी जिम्मेवारीमा सफलता प्राप्त होस् भन्ने शुभकामना दिएका थिए ।