मुख्यमन्त्री सिंह र एडीबी टोलीबीच भेटवार्ता, पिएफएम मूल्यांकनमा केन्द्रित छलफल

जनकपुरधाम । मधेश प्रदेश सरकारले सार्वजनिक वित्तीय व्यवस्थापन (पिएफएम ) मूल्यांकनको प्रक्रिया अन्तिम चरणमा पुर्‍याएको छ ।

एशियन डेभलपमेन्ट बैंक (एडीबी) को प्राविधिक सहयोगमा स्वमूल्यांकन विधिबाट अगाडि बढाइएको यो प्रक्रिया पारदर्शिता, उत्तरदायित्व र प्रभावकारी बजेट कार्यान्वयनलाई प्रवर्द्धन गर्न केन्द्रित रहेको छ ।

बिहीबार एडीबीका निर्देशक श्रीनिवासन जर्नादनमको नेतृत्वमा आएको प्रतिनिधिमण्डलले मुख्यमन्त्री सतिश कुमार सिंहसँग भेट गर्दै मूल्यांकनको हालसम्मको प्रगति, नतिजा र आगामी कार्ययोजनाबारे जानकारी गराएको छ ।

छलफलमा प्रदेश सरकारका प्रमुख सचिव मदन भुजेल, प्रदेश नीति तथा योजना आयोगका उपाध्यक्ष डा. सोहन प्रसाद साह, साथै एडीबीका वरिष्ठ अधिकृत जुलिका र कृष्ण पाठकको उपस्थिति थियो ।

प्रदेश सरकारले सार्वजनिक वित्तीय प्रणालीलाई पारदर्शी, उत्तरदायी र दिगो बनाउने उद्देश्यले यो मूल्यांकन प्रक्रिया अघि बढाएको हो । एडीबी प्रतिनिधिमण्डलका अनुसार नेपालमा यसअघि गण्डकी प्रदेशले सार्वजनिक वित्तीय व्यवस्थापन मूल्यांकन सम्पन्न गरिसकेको छ भने मधेश प्रदेशको मूल्यांकन अन्तिम चरणमा पुगेको छ ।

यस मूल्यांकनबाट प्राप्त सुझाव र निष्कर्षलाई प्रदेश सरकारले आगामी नीति तथा बजेट निर्माणमा सघाउ पुग्ने गरी प्रयोग गर्ने तयारी गरेको छ ।