विदेशी विद्यार्थीद्वारा राजदेवी मन्दिरमा सरसफाइ, मधेशको संस्कृति बुझ्ने उद्देश्य

राजविराज । मधेशको संस्कृति, रहनसहन र सामाजिक जीवन नजिकबाट बुझ्ने उद्देश्यले राजविराज आएका विदेशी विद्यार्थीहरूले आज शुक्रबार विहान राजदेवी मन्दिर परिसरमा सरसफाइ गरेका छन् ।

अन्तर्राष्ट्रिय भोलेन्टियर सर्भिस कार्यक्रम अन्तर्गत १६ जना विदेशी विद्यार्थी हाल राजविराजमा छन् । ती सबै ताइवानको नेशनल चुँग सिंग युनिभर्सिटीमा अध्ययनरत हुन् । उनीहरू असार १७ गते राजविराज आइपुगेका हुन् र असार ३१ गतेसम्म राजविराजमै रहेर विभिन्न गतिविधिमा संलग्न हुने कार्यक्रम रहेको छ ।

टोलीले मधेशको संस्कृति, परम्परा, रहनसहन, भाषा तथा सामाजिक सम्बन्धको अध्ययन गर्नेछ । साथै, उनीहरूले आफ्ना अनुभव र सकारात्मक अभ्यासहरू यहाँका समुदायसँग साझा गर्नेछन् ।

नेपाल युनाइटसका राष्ट्रिय निर्देशक मोहम्मद रहमानका अनुसार, “विद्यार्थीहरूको यो भ्रमणले नेपालको विविधतापूर्ण समाज र संस्कृतिको प्रत्यक्ष अनुभव दिनुका साथै अन्तर्राष्ट्रिय स्तरमा मधेशको चिनारी दिन सहयोग पुग्नेछ ।”