शारीरिक तथा मानसिक स्वास्थ्यका लागि मेयर कप ब्याडमिन्टन प्रतियोगिता सुरु

राजविराज । शारीरिक तथा मानसिक स्वास्थ्य प्रवर्द्धन गर्ने उद्देश्यले राजविराजमा ‘राजविराज मेयर कप ब्याडमिन्टन प्रतियोगिता’ सुरु गरिएको छ ।

राजविराज–२ स्थित शहीद आनन्द कबर्ड हलमा आयोजित उद्घाटन कार्यक्रममा माननीय न्यायाधीश दीपक दाहाल, प्रमुख जिल्ला अधिकारी भोला दाहाल, राजविराज नगरपालिकाका कार्यवाहक नगरप्रमुख ईसरत परविन तथा सप्तरीका प्रहरी उपरीक्षक गौतम कुमार केसीले संयुक्त रूपमा रिबन काटेर तथा ब्याडमिन्टन खेलेर प्रतियोगिताको उद्घाटन गरेका हुन् ।

सप्तरी युथका अध्यक्ष मोहन यादवको अध्यक्षतामा सम्पन्न कार्यक्रममा राष्ट्रिय अनुसन्धान विभागका उपनिर्देशक कुलचन्द्र न्यौपाने, वडा नं. २ का वडा अध्यक्ष अरुण कुमार यादव, ब्याडमिन्टन संघका दीपक कार्की, कबर्ड हल संयोजक नीरज कर्ण, सप्तरी क्रिकेट संघका अध्यक्ष आयुष श्रेष्ठलगायतको उपस्थिति रहेको ब्याडमिन्टन संघका सचिव विष्णु यादवले जानकारी दिए ।

प्रतियोगितामा राजविराज नगरपालिकाका २५ वटा टिमको सहभागिता रहेको छ। खेल पुरुष डबल्स विधामा दुई चरणमा सञ्चालन गरिनेछ ।

अध्यक्ष यादवले स्फूर्ति, लचिलोपन, स्थिरता र सन्तुलनको विकास गर्दै शारीरिक तथा मानसिक रूपमा स्वस्थ जीवनशैलीको प्रवर्द्धनका लागि प्रतियोगिता आयोजना गरिएको बताए ।

यस प्रतियोगितालाई राजविराज नगरपालिकाले सहयोग गरेको हो भने आयोजनाको जिम्मेवारी सप्तरी युथले लिएको हो ।