सप्तरी प्राइड लिग (एसपिएल) मेयर कप असार २६ देखि सुरु हुने

राजविराज । नेपाल क्रिकेट संघको सहकार्यमा आयोजना हुने सप्तरी प्राइड लिग (एसपिएल) अन्तर्गतको ‘राजविराज मेयर कप क्रिकेट लिग – सिजन ७ प्रतियोगिता आगामी असार २६ गतेदेखि सुरु हुने भएको छ ।

प्रतियोगिता सप्तरी क्रिकेट संघको आयोजनामा, राजविराज नगरपालिकाको सहयोग तथा मधेश प्रदेश क्रिकेट संघको सहकार्यमा हुने छ ।

यसअघि सम्पन्न भएको राजविराज मेयर कप महिला प्राइड लिग – सिजन २ को सफलतापछि अब पुरुषतर्फको लिग सुरु गर्न लागिएको हो । प्रतियोगिता राजविराजस्थित पवि मावि खेल मैदानमा हुनेछ ।

सप्तरी क्रिकेट संघका सचिव चन्दनकुमार यादवका अनुसार प्रतियोगितामा जम्मा आठ टिमको सहभागिता रहनेछ । ती टिमहरूमा राजविराज राजदेबी रोयल्स, कंचनरुप राइनोज, रूपनी राइडर्स, खडक वारियर्स, राजगढ वारियर्स, हनुमाननगर हिरोज, तिरहुत टाइगर्स, र रोयल च्यालेन्जर बरहीबिरपुर रहेका छन् ।

प्रत्येक टिममा सप्तरी जिल्लाका नौ जना अनिवार्य खेलाडी तथा दुई जना राष्ट्रिय वा अन्तर्राष्ट्रिय स्तरका बाह्य खेलाडी हुनेछन् । लिग कम नकआउट प्रणालीमा खेलाइने प्रतियोगिता दुईवटा पुलमा विभाजन गरी सञ्चालन गरिने बताइएको छ ।

प्रतियोगिताको प्रत्यक्ष प्रशारण मधेश प्रदेश क्रिकेट संघको युट्युब च्यानलमार्फत हुने छ भने खेलहरूको स्कोरिंग ‘क्रिकक्लव’ एपमार्फत अनलाइन हेर्न सकिनेछ ।