चन्दन यादब 
राजविराज । राजविराजमा जारी सप्तरी प्राइड लिगको दोस्रो दिनको पहिलो खेलमा राजगढ वारियर्सले हनुमाननगर हिरोजलाई २३ रनले पराजित गरेको छ ।
पवि स्कूल मैदानमा १३२ रनको लक्ष्य पछ्याउँदै ब्याटिङमा उत्रिएको हनुमाननगर हिरोज १७.५ ओभरमै सबै विकेट गुमाउँदै १०८ रनमै समेटियो । हनुमाननगरका लागि गोमनन्द अमात्य र एकलब्य मुखियाले समान २३ रन बनाए पनि टिमलाई जित दिलाउन पर्याप्त हुन सकेन ।
राजगढ वारियर्सका बलर नयन यादव र रोशन यादवले समान ३ विकेट लिँदै टोलीलाई जित दिलाउन महत्वपूर्ण भूमिका खेले। यस्तै, आनन्द मण्डलले २ विकेट लिए भने विक्की पासवान र विष्णु मण्डलले १/१ विकेट हात पारे ।
यसअघि टस जितेर ब्याटिङ गरेको राजगढ वारियर्सले २० ओभरमा ७ विकेट गुमाउँदै १३१ रन बनाएको थियो ।
वारियर्सका लागि विष्णु मण्डलले सबैभन्दा बढी ३९ रन बनाए । उनले ३३ बलमा चार चौका र एक छक्का प्रहार गरेका थिए। त्यसैगरी, नयन यादवले ३१ बलमा चार चौका र एक छक्काको मद्दतले ३६ रन जोडे । मोहम्मद असरलले पनि २२ रनको योगदान दिए ।
हनुमाननगरका बलर सिवान यादवले २ विकेट लिए भने उज्ज्वल झा र सञ्जन बैठाले १/१ विकेट लिए ।
अलराउण्ड प्रदर्शन गरेका नयन यादव खेलको ‘प्लेयर अफ द म्याच’ घोषित भए ।
उक्त अवसरमा राजविराज नगरपालिकाका योजना अधिकृत मनोज यादव र वडा नं. ५ का वडा अध्यक्ष बन्धु दासले संयुक्त रूपमा यादवलाई ट्रफीसहित नगद १ हजार ५ सय रुपैयाँको पुरस्कार प्रदान गरेका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |