चन्दन यादब 
राजविराज । सप्तरी प्राइड लिगअन्तर्गत चौथो दिनको पहिलो खेलमा कञ्चनरूप राइनोजले राजगढ वारियर्सलाई पाँच विकेटले पराजित गरेको छ ।
राजगढ वारियर्सले दिएको १२५ रनको लक्ष्य कञ्चनरूप राइनोजले १६ ओभरमै पाँच विकेट गुमाएर पुरा गर्यो ।
राइनोजका ओपनर राकेश कामतले विस्फोटक ब्याटिङ गर्दै २५ बलमा ८ चौका र ३ छक्कासहित ५४ रनको अर्धशतक प्रहार गरे। त्यस्तै, राशिद खानले ३० बलमा ३१ रन बनाए भने रोनक सिंहले २४ बल खेलेर अविजित १७ रनको योगदान दिए ।
बलिङतर्फ राजगढ वारियर्सका बिक्की पासवान र रोशन यादवले समान २ विकेट लिए ।
त्यसअघि, टस जितेर पहिले ब्याटिङ गरेको राजगढ वारियर्सले निर्धारित २० ओभरमा ९ विकेट गुमाएर १२४ रन बनाएको थियो ।
वारियर्सका लागि नयन यादवले सर्वाधिक ३३ रन बनाए भने रोशन यादवले ३२ रन, अजित यादवले १५ रन, र मनिष यादवले अविजित १४ रन जोडे ।
कञ्चनरूप राइनोजका बलरहरूमध्ये राशिद खान, उमेश चौधरी र अभिमन्यु सरदारले समान २ विकेट लिए भने मुकेश सिंहले १ विकेट लिएका थिए ।
खेलको ‘प्लेयर अफ द म्याच’ कञ्चनरूप राइनोजका ओपनर राकेश कामत घोषित भए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |