सप्तरी प्राइड लिग : राजविराज राजदेवी रोयल्स र तिरहुट टाइगर्स सेमीफाइनलमा

राजविराज । सप्तरीको राजविराजस्थित पबी स्कुल मैदानमा जारी सप्तरी प्राइड लिगको सातौं संस्करण अन्तर्गत पाँचौं दिनका खेलहरू आज सम्पन्न भएका छन् । आजका खेलहरूमार्फत समूह ‘ए’ बाट राजविराज राजदेवी रोयल्स र समूह ‘बी’ बाट डिफेन्डिङ च्याम्पियन तिरहुट टाइगर्स सेमीफाइनलमा स्थान बनाउने पहिलो दुई टोली बनेका छन् ।

पहिलो खेलमा राजविराज राजदेवी रोयल्स र राजगढ वारियर्सबीचको भिडन्त वर्षाका कारण नतिजाविहीन टुंगिएको हो । टस हारेर पहिले ब्याटिङ गरेको राजदेवी रोयल्सले १४.१ ओभरमा ४ विकेटको क्षतिमा १५० रनको सानदार योगफल तयार पारेको थियो । तर त्यसपछि आएको अविरल वर्षाले खेल अवरुद्ध गरायो र अन्ततः रद्द गरिएको घोषणा गरियो। जसका कारण दुबै टिमले १/१ अंक बाँडेका छन् ।

राजदेवी रोयल्सका ओपनर रोहन विकले आक्रामक ब्याटिङ गर्दै २४ बलमा ४ चौका र ४ छक्कासहित सर्वाधिक ५१ रन बनाए । बसन्त यादवले अविजित २८ रनको योगदान दिए भने दिवान पुनले २०, अभिषेक तिवारीले अविजित १५ र प्रविन यादवले १४ रन बनाए । राजगढ वारियर्सको बलिङतर्फ रोशन यादवले ३ ओभरमा २९ रन खर्चेर ३ विकेट लिए भने बिकी पासवानले १ विकेट हात पारे ।

दोस्रो खेलमा तिरहुट टाइगर्सले रुपनी राइडर्सलाई एकतर्फी रुपमा १० विकेटले पराजित गर्दै सेमीफाइनल यात्रा सुनिश्चित गर्‍यो। वर्षाका कारण खेल १२ ओभरमा सीमित गरिएको थियो ।  टस जितेर ब्याटिङ गरेको रुपनी राइडर्सले ९.४ ओभरमै ५८ रनमै समेटिएको थियो। कमजोर प्रदर्शन गरेको ब्याटिङ लाइनअपबाट बिकी चौधरीले १५ र विशाल पटेलले १० रन बनाए, तर अन्य ब्याटरहरूले दोहोरो अंकमा रन बनाउन सकेनन् ।

तिरहुट टाइगर्सका बलर चित्र बहादुर बिष्टले घातक प्रदर्शन गर्दै ३ ओभरमा १२ रन खर्चेर ५ विकेट लिए । उनको सानदार बलिङका कारण विपक्षी टोली सस्तोमै समेटिएको थियो । उनले ‘प्लेयर अफ द म्याच’को उपाधि जिते। अजय यादवले २.४ ओभरमा १० रन खर्चेर ३ विकेट लिए भने अनिल यादवले १ विकेट लिएका थिए ।

५९ रनको लक्ष्य पछ्याउन मैदानमा उत्रिएको तिरहुट टाइगर्सले मात्र २३ बलमै लक्ष्य भेट्टायो । ओपनर अविनाश कर्णले ५ चौका र २ छक्का सहित ३९ रन बनाए भने अर्का ओपनर भोला शाह ११ रनमा अविजित रहे। सहज जितसँगै टाइगर्स समूह ‘बी’ को शीर्ष स्थानमा रहँदै सेमीफाइनलमा पुग्न सफल भयो ।

खेलपछि ‘प्लेयर अफ द म्याच’ चित्र बहादुर बिष्ट र ‘गेम चेन्जर’ अजय यादवलाई राजविराज नगरपालिका वडा नं ६ का अध्यक्ष शशी चौधरी र नगर कार्यपालिका सदस्य सोनी रजकले ट्रफी र नगद पुरस्कार प्रदान गरेका थिए ।

आजको खेलपछिको अंकतालिकामा समूह ‘ए’ मा राजविराज राजदेवी रोयल्सले ३ खेलमा ५ अंक बटुलेर शीर्ष स्थानमा रहँदै सेमीफाइनलको यात्रा तय गरिसकेको छ। त्यस्तै, राजगढ वारियर्स ३ खेलमा ३ अंकसहित दोस्रो स्थानमा रहेको छ । समूहकै अन्य दुई टोली कन्चनरुप राइनोज र हनुमाननगर हिरोजले समान २ र ० अंक बटुलेका छन्। हनुमाननगरको यात्रा समाप्त भइसकेको छ भने राइनोजले अन्तिम खेलमा जित निकालेमा अर्को चरणमा पुग्ने सम्भावना जीवित रहनेछ ।

त्यस्तै, समूह ‘बी’ मा तिरहुट टाइगर्स ३ खेलमा ६ अंकसहित अपराजित रहँदै सेमीफाइनल प्रवेश गरिसकेको छ। रुपनी राइडर्स भने तीनै खेलमा पराजित हुँदै प्रतियोगिताबाट बाहिरिएको छ । समूहका अन्य दुई टोली, रोयल च्यालेन्जर्स बाह्री वीरपुर र खडक वारियर्सले समान २ अंक बटुलेका छन्। भोलि यी दुई टोलीबीच हुने खेल निर्णायक हुनेछ, जहाँ विजयी टोली समूह ‘बी’ बाट दोस्रो सेमीफाइनलिस्टको रूपमा अघि बढ्नेछ ।