चन्दन यादब 
राजविराज । सप्तरीको राजविराजमा जारी सातौँ संस्करणको मेयर कप अन्तर्गतको ‘सप्तरी प्राइड लिग’ क्रिकेट प्रतियोगिताको सेमीफाइनल समीकरण पूरा भएको छ ।
मंगलबार सम्पन्न दुई खेलमा शानदार जित निकाल्दै कञ्चनरुप राइनोज समूह ‘ए’ को उपविजेता तथा खडक वारियर्स समूह ‘बी’ को उपविजेता बनेर सेमीफाइनलमा प्रवेश गरेका छन् । यसअघि नै राजविराज राजदेवी रोयल (समूह ‘ए’ विजेता) र तिरहुट टाइगर्स (समूह ‘बी’ विजेता) अन्तिम चारमा पुगिसकेका थिए ।
यससँगै राजगढ वारियर्स, हनुमाननगर हिरोज, रोयल च्यालेन्जर्स बाह्री वीरपुर र रुपनी राइडर्स प्रतियोगिताबाट बाहिरिएका छन् ।
सेमीफाइनल खेलहरू बुधबार हुनेछन्, जहाँ पहिलो खेलमा राजविराज राजदेवी रोयलले खडक वारियर्ससँग प्रतिस्पर्धा गर्नेछ भने दोस्रो खेलमा तिरहुट टाइगर्सले कञ्चनरुप राइनोजसँग भिडन्त गर्नेछ । उपाधि प्रतिस्पर्धा साउन १ गते बिहीबार हुनेछ ।
पबी स्कुल मैदानमा सम्पन्न पहिलो खेलमा कञ्चनरुप राइनोजले हनुमाननगर हिरोजलाई ४ विकेटले पराजित गर्दै सेमीफाइनलमा स्थान सुरक्षित गर्यो ।
सिर्जना गरिएको ३८ रनको लक्ष्य राइनोजले ८.४ ओभरमा ६ विकेट गुमाएर भेट्टायो ।
राइनोजका महानन्द यादवले १२ बलमा २ चौका र १ छक्का सहित १४ रन बनाउँदै टिमलाई जितको नजिक पुर्याए। राकेश कामतले ८ रन, रौनक सिंहले ६ रन र रिराज सहाले ५ रनको योगदान दिए ।
हिरोजका बलर सञ्जन बैठाले २.४ ओभरमा २२ रन खर्चिएर ३ विकेट लिए, तर उनीहरूको प्रयास पर्याप्त रहेन । गोमानन्द अमात्यले २ विकेट र सञ्जीव मण्डलले १ विकेट लिए ।
यसअघि टस जितेर ब्याटिङ गरेको हनुमाननगर हिरोज १०.३ ओभरमै ३७ रनमा अलआउट भयो ।
राइनोजका सम्भु मण्डल र अभिमन्यु सरदारले समान ४–४ विकेट लिए। प्लेयर अफ द म्याच घोषित मण्डलले ४ ओभरमा २२ रन खर्चिए भने सरदारले ३ ओभरमा ९ रन मात्र दिए। मुकेश सिंहले २ विकेट लिए ।
आजै सम्पन्न दोस्रो खेलमा खडक वारियर्सले रोयल च्यालेन्जर्स बरही वीरपुरलाई ८ विकेटले पराजित गर्दै सेमीफाइनल यात्रा तय गर्यो ।
१२२ रनको लक्ष्य वारियर्सले १६ ओभरमा मात्र २ विकेट गुमाएर पुरा गर्यो ।
वारियर्सका सन्तोष कार्कीले अविजित ६३ रनको अर्धशतकीय योगदान दिए, जसमा उनले ४० बलमा ५ चौका र ४ छक्का प्रहार गरे । ओपनर फिरदोस अन्सारीले अविजित ४३ रन बनाए (३४ बलमा ६ चौका)। उनीहरूले तेस्रो विकेटका लागि ९२ रनको साझेदारी गर्दै टिमलाई सहज जित दिलाए ।
यसअघि टस जितेर ब्याटिङ गरेको वीरपुरले २० ओभरमा ८ विकेट गुमाउँदै १२१ रन बनाएको थियो। भीम यादवले सर्वाधिक २५ रन बनाए भने तृप्तराज दासले २२, राहुल विकले १५ र अमित यादवले १४ रन जोडे ।
खडक वारियर्सका बलर फिरदोस अन्सारी, अभिषेक कार्की र अनिल कुमार यादवले समान २–२ विकेट लिए। पप्पु यादव (बी) र पप्पु यादव (ए) ले समान १ विकेट लिए ।
खेलपछि सन्तोष कार्कीलाई प्लेयर अफ द म्याच र फिरदोस अन्सारीलाई गेम चेन्जर घोषित गर्दै राजविराज नगरपालिका वडा नं. ११ का अध्यक्ष उदित नारायण यादव र कार्यपालिका सदस्य ललिता कर्णले कप तथा नगद पुरस्कार प्रदान गरेका थिए ।
सप्तरी क्रिकेट संघद्वारा आयोजित प्रतियोगितामा विजेता टिमले रु. २ लाख र उपविजेताले रु. १ लाख पुरस्कार प्राप्त गर्ने संघका सचिव चन्दनकुमार यादवले जानकारी दिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |