भूषण सिहं 
राजविराज । मधेश प्रदेशका मुख्यमन्त्री सतिश कुमार सिंहले आज जिल्ला प्रशासन कार्यालय, सप्तरीमा टोकन प्रणालीअनुसार पालो कुर्दै सेवा लिई उदाहरणीय कार्य गर्नु भएको छ ।
मुख्यमन्त्री सिंहले सर्वसाधारण सेवाग्राहीझैं टोकन लिई नागरिकताको प्रतिलिपि तथा राष्ट्रिय परिचयपत्रसम्बन्धी सेवा प्राप्त गर्नु भएको हो । कार्यालयमा उपस्थित सेवाग्राहीसँगै लाइनमा उभिएर सेवा लिँदा उहाँको साधारणता र जनमैत्री व्यवहारले धेरैलाई प्रभावित पारेको छ ।
सिंहले जनप्रतिनिधि तथा सरकारी अधिकारीले पनि जनतासँगै सेवा प्रक्रिया अनुरूप अघि बढ्नुपर्छ भन्ने सन्देश दिनुभएको छ । “सेवाग्राहीले भोग्ने अवस्थाको अनुभूति गर्न र सेवा प्रवाहको अवस्था बुझ्न आफैँ सेवा लिने निर्णय गरेको हुँ,” उहाँले भन्नुभयो।
मुख्यमन्त्री सिंहको यो व्यवहारले जनताको विश्वास बढाउनुका साथै कार्यालयमा सेवा प्रवाह प्रणालीलाई थप पारदर्शी, उत्तरदायी र अनुकरणीय बनाउने अपेक्षा गरिएको छ ।
जिल्ला प्रशासन कार्यालय, सप्तरीका प्रमुख जिल्ला अधिकारीले पनि मुख्यमन्त्री सिंहज्यूको यो कदमलाई सकारात्मक सन्देश दिने उदाहरणका रूपमा लिनुपर्ने बताएका छन् ।
साथै, नागरिकले समेत यस्तो कार्यलाई स्वागत गर्दै जनप्रतिनिधिबाट यस्तै जनउत्तरदायी व्यवहारको अपेक्षा राखेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |