भूषण सिहं 
राजविराज । सप्तरी जिल्लामा शनिबार दुई जनाको झुण्डिएको अवस्थामा शव फेला परेको छ । एक युवक र एक महिलाको शव अलग–अलग स्थानमा झुण्डिएको अवस्थामा भेटिएको हो ।
पहिलो घटना अग्निसाइर वृष्णासवरण गाउँपालिका–४ स्थित बनौलीमा भएको हो । स्थानीय १९ वर्षीय अरबिन्द साह झुण्डिएको अवस्थामा मृत फेला परेका छन् । साह एक रुखमा झुण्डिएको अवस्थामा फेला परेपछि स्थानीयले प्रहरीलाई खबर गरेका थिए । इलाका प्रहरी कार्यालय कञ्चनपुरका प्रहरी नायब उपरीक्षक माधव प्रसाद काफ्लेले घटनास्थलमा प्रारम्भिक अनुसन्धानपछि शव परीक्षणका लागि गजेन्द्रनारायण सिंह अस्पताल, राजविराज पठाइएको जानकारी दिए ।
त्यस्तै, दोस्रो घटना राजविराज नगरपालिका–८ स्थित हिमालय टोलमा भएको हो । कृष्ण पोखरेलको घरमा डेरा गरी बस्ने २९ वर्षीया रितु पौडेल आफ्नै कोठाको सिलिङ फ्यानमा खादाको पासो लगाई झुण्डिएको अवस्थामा फेला परेको जिल्ला प्रहरी कार्यालय सप्तरीले जनाएको छ । रितु सर्लाही जिल्लाको चन्द्रनगर गाउँपालिका–१, किसानपुरकी स्थायी बासिन्दा हुन् ।
दुबै घटनाबारे थप अनुसन्धान भइरहेको प्रहरीले जनाएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |