भूषण सिहं 
राजविराज । सप्तरीको राजविराज नगरपालिका- ७ की २५ वर्षीया नितु कुमारी मेहता १६ दिनदेखि रहस्यमय रूपमा बेपत्ता भएकी छन् । घरबाट जेठी छोरीलाई विद्यालय पुर्याएर फर्किने भन्दै निस्केकी नितुको अहिले सम्म कुनै अत्तोपत्तो लागेको छैन ।
नितुको बेपत्ता हुनु सामान्य घटनाभन्दा पनि एक गम्भीर र जटिल रहस्य बनेको छ । बेपत्ताको दिन अर्थात असार २० गते बिहान १०:३० बजे उनले ६ वर्षीया छोरी सन्ध्यालाई नोबेल एकेडेमी स्कुल पुर्याएको सीसीटीभी फुटेजमा देखिन्छ । त्यसपछि दिउँसो २ बजेतिर उनी एक्लै सीमावर्ती भारतीय बजार भीमनगरतर्फ गइरहेको अर्को सीसीटीभी फुटेजमा देखिएको छ ।
अझ चकित पार्ने कुरा त के भने, आमाले छोरीलाई “म मामाघर जान्छु, ३–४ दिनमा फर्किन्छु” भनी बताएका रहेछिन् । यसले घटना योजनाबद्ध थियो कि भन्ने आशंका पनि जन्माएको छ । तर, श्रीमान सुरेन्द्र मेहताले भने, “जहाँ जानुछ, त्यहाँ जाँदैछु, २ वटै छोरीलाई राम्ररी हेर्नू” भनेर फोनमा अन्तिम पटक कुरा गरेपछि नितुले मोबाइल बन्द गरेकी थिइन् ।
दुबईमा रोजगारीरत सुरेन्द्र मेहता जेठी छोरी सन्ध्याको मुण्डन समारोहका लागि घर फर्किएका थिए । तर समारोह अघि नै श्रीमतीको हराइले उनी मानसिक रूपमा निकै पीडित छन् ।
“हामीले सबै सम्भावित स्थान, आफन्त, साथीभाइ र नातागोता कहाँ खोजिसकेका छौं । प्रहरीलाई पनि हराएको दिन राति १० बजे नै खबर गरेका थियौं । तर अहिलेसम्म केही पत्ता लागेको छैन,” ससुरा राम नारायण मेहताले बताए ।
प्रहरी नायब उपरीक्षक जितेन्द्र कुमार वस्नेतका अनुसार, सीसीटीभी फुटेज तथा सीमावर्ती क्षेत्रका सम्भावित स्थानहरूमा खोजी कार्य तीव्र पारिएको छ । तर अहिलेसम्म खोजी अभियान निष्कर्षमा पुग्न सकेको छैन ।
सामाजिक सञ्जालमा नितुको फोटोसहित परिवारले सार्वजनिक अपिलसमेत गरिसकेका छन् । मानव तस्करी, घरेलु समस्या वा स्वेच्छिक रूपमा बाहिरिएको जस्ता विभिन्न कोणबाट अनुसन्धान भइरहे पनि यो घटना दिनदिनै रहस्यमय बन्दै गएको छ ।
नितुको सुराकी पाउन नसकिँदा परिवार मानसिक तनावमा छन् भने स्थानीय स्तरमा पनि यो घटना चासोको विषय बनेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |